सलग तिसऱ्या सत्रात शेअरबाजार घसरणीत

सेन्सेक्स 31 अंकांनी नुकसानीत : मिडकॅप निर्देशांक सर्वाधिक घसरला

मुंबई :

भारतीय शेअरबाजार बुधवारीही घसरणीसोबत बंद होताना दिसला आहे. सेन्सेक्स 31 अंकांनी घसरणीसह बंद झाला. मिडकॅप समभागांमध्ये मोठी घसरण दिसून आली. हा निर्देशांक जवळपास 1 टक्का नुकसानीसह बंद झाला.

बुधवारी सरतेशेवटी मुंबई शेअरबाजाराचा 30 समभागांचा सेन्सेक्स निर्देशांक 31 अंकांनी घसरत 85106 च्या स्तरावर बंद झाला तर दुसरीकडे राष्ट्रीय शेअरबाजाराचा निफ्टी निर्देशांक 46 अंकांनी घसरणीसोबत 25986 अंकांवर बंद झाला. बँक निफ्टी निर्देशांक 74 अंकांची तेजी राखत बंद झाला. बाजारात रुपया डॉलरच्या तुलनेत मोठ्या प्रमाणात घसरत 90 च्या आसपास होता. पहिल्यांदाच रुपयाने 90 चा स्तर गाठला. यानेच बाजारात दबावाचे वातावरण तयार केले. विविध निर्देशांकांची कामगिरी पाहिल्यास फायनॅन्शीयल्स, आयटी, फार्मा या क्षेत्रांचे निर्देशांक तेजीत राहिले तर दुसरीकडे ऑटो, कमोडिटीज, सीपीएसई, एनर्जी, एफएमसीजी, इन्फ्रा, मेटल, ऑइल अँड गॅस, रियल्टी यांचे निर्देशांक मात्र नुकसानीसोबत बंद झाले. निफ्टी पीएसयू बँक निर्देशांक 3 टक्केपेक्षा अधिक घसरणीत राहिला होता. त्याचप्रमाणे डिफेन्स, कंझ्युमर ड्युरेबल्स, ऑटो समभागांमध्ये विक्रीवर भर दिसून आला. मिडकॅप निर्देशांक जवळपास 1 टक्का इतका नुकसानीत होता.

समभागांची कामगिरी

सेन्सेक्समध्ये पाहता महिंद्रा आणि महिंद्रा 1.79 टक्का, टायटन 1.76 टक्का, नेस्ले इंडिया 1.63 टक्के, एनटीपीसी 1.63 टक्का वर एचयुएलचा समभाग 1.51 टक्का घसरणीत होता. निफ्टीत मॅक्स हेल्थकेअर, अदानी एंटरप्रायझेस, बीईएल, टाटा कंझ्युमर, श्रीराम फायनान्स यांचे समभागही घसरणीत होते. निफ्टीत तेजी राखण्यात विप्रो, टीसीएस, आयसीआयसीआय बँक, हिंडाल्को, इन्फोसिस व एचडीएफसी बँक या समभागांना यश आले होते. मिडकॅपमध्ये पाहता वोडाफोन आयडिया, अपोलो टायर्स, बायोकॉन, हिंदुस्थान झिंक, अशोक लेलँड, भारती हेक्साकॉम यांचे समभाग नफ्यासह बंद झाले तर दुसरीकडे या क्षेत्रातील इंडियन बँक, हुडको, बँक ऑफ इंडिया, सोलार इंडस्ट्रिज, डिक्सन टेक्नॉलॉजी व बीएसई लिमिटेड यांचे समभाग नुकसानीत होते. कोरीया, जपानचे बाजार तेजीत होते तर हाँगकाँगचा बाजार नुकसानीत होता. अमेरिकेतील डो जोन्स 2 तारखेला तेजीसह बंद झाला होता.