स्टेट बँकेचा नफा 28 टक्क्यांनी वाढला

एकूण उत्पन्न 15 टक्क्यांनी वाढून 1.29 लाख कोटींवर

वृत्तसंस्था/ मुंबई

स्टेट बँक ऑफ इंडिया (एसबीआय), देशातील सर्वात मोठी सरकारी बँक, यांनी 2024-25 च्या आर्थिक वर्षाच्या दुसऱ्या तिमाहीत 18,331 कोटी रुपयांचा स्वतंत्र निव्वळ नफा नोंदवला. त्यात वार्षिक आधारावर 28 टक्क्यांनी वाढ झाली आहे. एका वर्षापूर्वी म्हणजेच आर्थिक वर्ष 2023-24 च्या दुसऱ्या तिमाहीत कंपनीला 14,330 कोटी रुपयांचा नफा झाला होता.

बँकेच्या एकूण उत्पन्नात 15.13 टक्के वाढ

बँकेचे एकूण उत्पन्न जुलै-सप्टेंबर या तिमाहीत वार्षिक 15.13 टक्क्यांनी वाढून रु. 1,29,141 कोटी झाले आहे, जे मागील वर्षीच्या याच तिमाहीत 1,12,169 कोटी होते. मागील तिमाहीच्या तुलनेत त्यात 5.26 टक्के वाढ झाली आहे. एप्रिल-जूनमध्ये बँकेचे उत्पन्न 1,22,687 कोटी रुपये होते.

एसबीआय देशातील सर्वात मोठी सरकारी बँक

स्टेट बँक ऑफ इंडिया ही देशातील सर्वात मोठी सरकारी बँक आहे. एसबीआयमध्ये सरकारचा 57.59 टक्के हिस्सा आहे. बँकेची स्थापना 1 जुलै 1955 रोजी झाली. बँकेचे मुख्यालय मुंबई येथे आहे. बँकेच्या 22,500 हून अधिक शाखा आणि 50 कोटींहून अधिक ग्राहक आहेत. बँक जगातील 29 देशांमध्ये कार्यरत आहे.