आमदार अपात्रतेसंबंधी सभापतींच्या आदेशाला उच्च न्यायालयात आव्हान

पणजी : काँग्रेसमधून भाजपात  प्रवेश केलेल्या आठ आमदारांच्या अपात्रतेसंदर्भात  सभापती रमेश तवडकर यांनी दिलेल्या आदेशाला उच्च न्यायालयात आव्हान देण्यात आले आहे. सर्वोच्च न्यायालयाच्या सूचनेप्रमाणे गिरीश चोडणकर यांनी उच्च न्यायालयात याचिका दाखल केली आहे. याप्रकरणी 15 जानेवारी रोजी  सुनावणी होणार आहे. सर्वोच्च न्यायालयात याप्रकरणी सुनावणी दरम्यान, सभापतींच्या आदेशाविरोधात घटनेच्या कलम 136 अंतर्गत याचिका दाखल झाली आहे. कलम 136 नुसार सर्वोच्च न्यायालय याप्रकरणी सुनावणी करू शकत नाही, असे सरन्यायाधीश संजीव खन्ना यांनी स्पष्ट केले आहे. सरन्यायाधीश संजीव खन्ना यांनी चोडणकरांना कलम 226 नुसार उच्च न्यायालयात जाण्याचे निर्देश दिले. त्यानुसार चोडणकर यांनी ती याचिका मागे घेतली आहे.

सप्टेंबर-2022 मध्ये काँग्रेसचे आठ आमदार भाजपमध्ये सामील झाले होते. यामध्ये आमदार मायकल लोबो, दिगंबर कामत, आलेक्स सिक्वेरा, संकल्प आमोणकर, डिलायला लोबो, केदार नाईक, राजेश फळदेसाई आणि ऊडॉल्फ फर्नांडिस यांचा समावेश आहे. या आठ आमदारांनी त्यावेळी काँग्रेसच्या निवडून आलेल्या 11 आमदारांमध्ये आपला वेगळा गट स्थापन करून भाजपमध्ये सामील झाले होते.  गिरीश चोडणकर यांनी सभापतींकडे या आठ आमदारांना अपात्र करण्याची मागणी करणारी याचिका दाखल केली होती. सभापती रमेश तवडकर यांनी त्यांची याचिका फेटाळून  लावल्यावर चोडणकर यांनी नोव्हेंबरमध्ये थेट सर्वोच्च न्यायालयात आव्हान याचिका दाखल केली होती. या आठ आमदारांचा भाजप प्रवेश बेकायदेशीर असून घटनेच्या 10 व्या अनुसूचित कलमानुसार त्यांना अपात्र ठरवावे म्हणून त्यांनी मागणी केली होती.

याप्रकरणी सर्वोच्च न्यायालयात झालेल्या सुनावणी दरम्यान, सभापतींच्या आदेशाविरोधात घटनेच्या कलम-136अंतर्गत याचिकेवर  सर्वोच्च न्यायालय  थेट सुनावणी करू शकत नाही, असे सरन्यायाधीश संजीव खन्ना यांनी स्पष्ट केले होते. त्यासाठी याचिकादाराने आधी उच्च न्यायालयात दाद मागणे आवश्यक असल्याचे निर्देश दिले. या निर्देशानुसार चोडणकर यांनी आता पुन्हा उच्च न्यायालयात याचिका  दाखल केली आहे.

उच्च न्यायालयात अवमान याचिका

दरम्यान आमदार अपात्रतेबाबत काँग्रेसने दाखल केलेल्या याचिकेवर वेळेत निर्णय न दिल्याबाबत काँग्रेस प्रदेशाध्यक्ष अमित पाटकर यांच्याकडून सभापती रमेश तवडकर यांच्याविरोधात उच्च न्यायालयात अवमान याचिका दाखल करण्यात आली आहे.