स्पेनकडून ऑस्ट्रियाचा 3-0 असा धुव्वा

वृत्तसंस्था, इंग्लवूड, कॅलिफोर्निया : मिकेल ओयारझाबलने केलेल्या दोन गोलांच्या जोरावर स्पेनने ऑस्ट्रियाचा 3-0 असा पराभव केला आणि उपउपांत्यपूर्व फेरी गाठली. 2010 मध्ये विजेतेपद जिंकल्यानंतर बाद फेरीच्या सामन्यातील हा स्पेनचा पहिलाच विश्वचषक विजय ठरला. ते आता पोर्तुगालचा सामना करतील.

जरी स्पेन या वर्षीच्या विश्वचषकात विजेतेपदाचा प्रबळ दावेदार मानला गेला असला आणि साखळी सामन्यांमध्ये अपराजित राहण्याची कामगिरी त्यांनी केलेली असली, तरी त्यांचे पहिले तीन सामने फारसे प्रभावी नव्हते. मात्र बाद फेरीत दिग्गज खेळाडूंनी नटलेल्या या संघाने आपली संपूर्ण क्षमता पणाला लावली आणि हे सिद्ध केले की, स्पेनचा संघ लोकांच्या अपेक्षांनुसार उत्कृष्ट आहे आणि कदाचित तो अधिकच बहरत चालला आहे.

दुसऱ्या सत्रामध्ये पेद्रो पोरोने आणखी एक गोल केला. स्पेनने या स्पर्धेतील आपली सर्वांत प्रभावी कामगिरी यावेळी सादर केली. त्यांच्या प्रसिद्ध संघरचनेने आक्रमक खेळात कल्पकता आणि बचावात कठोर शिस्त दाखवून दिली. ‘जेव्हा गरज असते तेव्हा महान संघ आपली सर्वोत्तम कामगिरी करतात’, असे स्पेनचे प्रशिक्षक लुईस डी ला फुएन्ते म्हणाले. आम्ही एक उत्कृष्ट सामना खेळलो. आम्ही परिपूर्णतेच्या खूप जवळ पोहोचलो होतो, पण आम्ही सुधारणा करत राहणे आवश्यक आहे, असे त्यांनी सांगितले.

ओयारझाबल, फूलबॅक मार्क कुकुरेला आणि विंगर लॅमिन यामाल यांनी आक्रमणात चमकदार कामगिरी केली. ’सो-फाय’ स्टेडियमवर स्पेनच्या समर्थकांनी खच्चून भरलेल्या गर्दीकडून मिळणाऱ्या प्रचंड प्रोत्साहनादरम्यान स्पेनने गोलच्या दिशेने मारलेल्या 10 पैकी चार फटके यामालने मारले. बार्सिलोनाचा 18 वर्षीय स्टार खेळाडू यामाल याने या स्पर्धेतील आपला आतापर्यंतचा सर्वांत मोठा कालावधी या सामन्यात मैदानावर घालवला. 85 व्या मिनिटाला त्याला बाहेर काढण्यात आले. त्याआधी ऑस्ट्रियाचा बचावपटू डेव्हिड अलाबा याने यामालचा गोलच्या दिशेने जाणारा जोरदार फटका अडवून त्याची दिशा बदलली होती.

स्पेनच्या आक्रमणाची धुरा ‘रिअल सोसिदाद’चा कर्णधार ओयारझाबल याने सांभाळली. त्याने 36 व्या मिनिटाला पहिला गोल करून आणि 89 व्या मिनिटाला विजयावर शिक्कामोर्तब करणारा गोल करून या विश्वचषकातील आपली एकूण गोलांची संख्या चारवर नेली. ओयारझाबलच्या दोन्ही गोलांमध्ये कुकुरेलाने मदत केली. यातून मैदानावरच्या डाव्या बाजूने त्यांच्यातील उत्कृष्ट ताळमेळ दिसून आला.

ऑस्ट्रियाच्या गोलरक्षक अलेक्झांडर श्लागरने उत्कृष्ट कामगिरी करत सहा वेळा गोल करण्याचे प्रयत्न उधळून लावले. अल्जेरियाविऊद्ध ‘इंज्युरी-टाइम’मध्ये गोल करून सामना बरोबरीत सोडवल्यामुळे ऑस्ट्रियाने 1998 नंतर पहिल्यांदाच विश्वचषकाच्या बाद फेरीत प्रवेश केला होता.

गोलरक्षक सिमॉनकडून नवा विक्रम

स्पेनने या विश्वचषकात आतापर्यंत एकही गोल स्वीकारलेला नाही. ऑस्ट्रियाला गोलपोस्टच्या दिशेने एकही अचूक फटका मारता आला नाही, त्यामुळे गोलरक्षक उनाई सिमॉनला एकही बचाव करावा लागला नाही. त्याने सलग चौथ्यांदा प्रतिस्पर्ध्याला गोल करू दिला नाही आणि कतारमधील मागील स्पर्धेपासून सलग 519 मिनिटे गोल न स्वीकारण्याचा विश्वचषक विक्रम प्रस्थापित केला.