सपा नेते आझम खान यांना जामीन मंजूर

डुंगरपूर प्रकरणात उच्च न्यायालयाकडून मोठा दिलासा

वृत्तसंस्था/ अलाहाबाद

समाजवादी पक्षाचे नेते आणि माजी मंत्री आझम खान यांना बुधवारी अलाहाबाद उच्च न्यायालयाकडून मोठा दिलासा मिळाला. बुधवारी अलाहाबाद उच्च न्यायालयाने कथित डुंगरपूर प्रकरणात आझम खान यांना जामीन मंजूर केला. या प्रकरणात एक निवासी वसाहत जबरदस्तीने रिकामी करण्यात आल्याचा आरोप आहे. रामपूरच्या खासदार-आमदार न्यायालयाने आझम खान यांना दोषी ठरवत  10 वर्षांची शिक्षा सुनावली होती.

आझम खान यांनी दाखल केलेल्या जामीन अर्जावर न्यायमूर्ती समीर जैन यांनी जामीन देण्याचा आदेश दिला. यापूर्वी, 12 ऑगस्ट रोजी न्यायालयाने आझम खान आणि बरकत अली नावाच्या कंत्राटदाराच्या जामीन अर्जावर निर्णय राखून ठेवला होता. बरकत अली यांनी उच्च न्यायालयात फौजदारी अपील देखील दाखल केले आहे. आझम खान यांच्या वतीने वरिष्ठ वकील इम्रान उल्लाह आणि मोहम्मद खालिद यांनी युक्तिवाद केला.

बहुचर्चित डुंगरपूर प्रकरणात खासदार-आमदार न्यायालयाने आझम खान यांना 10 वर्षांच्या तुरुंगवासाची शिक्षा सुनावली होती. सपा नेत्याने याविरुद्ध अलाहाबाद उच्च न्यायालयात फौजदारी अपील दाखल केले होते. अपील प्रलंबित होईपर्यंत जामीन मिळावा अशी विनंती न्यायालयाने केली होती. 12 ऑगस्ट रोजी सुनावणी पूर्ण झाल्यानंतर न्यायालयाने निर्णय राखून ठेवला होता. बुधवारी न्यायालयाने आझम खान यांचा जामीन अर्ज स्वीकारत न्यायमूर्ती समीर जैन यांच्या न्यायालयाने या प्रकरणाची सुनावणी केली. या प्रकरणात कंत्राटदार बरकत अली यांनीही शिक्षेविरुद्ध अलाहाबाद उच्च न्यायालयात फौजदारी अपील दाखल केले आहे.