सोनम वांगचुक यांना रुग्णालयातून डिस्चार्ज मेदांतामधून थेट पोहोचले राजघाटावर, महात्मा गांधींना अभिवादन

► वृत्तसंस्था नवी दिल्ली
सामाजिक आणि पर्यावरण कार्यकर्ते सोनम वांगचुक यांना सोमवारी गुरुग्रामच्या मेदांता रुग्णालयातून डिस्चार्ज देण्यात आला. दुपारी 1:45 वाजता डिस्चार्ज मिळाल्यानंतर ते पत्नी डॉ. गीतांजली हिच्यासोबत दिल्लीतील राजघाटावर पोहोचले आणि त्यांनी महात्मा गांधींना अभिवादन केले. नीट पेपरफुटीशी संबंधित मुद्यांच्या निषेधार्थ वांगचुक यांनी दिल्लीत तब्बल 26 दिवस उपोषण केले होते. दिल्ली उच्च न्यायालयाच्या आदेशानुसार, दिल्लीतील सफदरजंग रुग्णालयात दाखल केल्यानंतर पोलिसांनी त्यांना गुरुग्रामच्या मेदांता रुग्णालयात दाखल केले होते.

राजघाटावर पोहोचल्यानंतर वांगचुक यांनी प्रसारमाध्यमांशी संवाद साधला. बापूंनी दाखवलेला मार्ग 100 वर्षांपूर्वी जितका योग्य आणि समर्पक होता, तितकाच तो आजही असल्याचे त्यांनी सांगितले. शांततापूर्ण आंदोलनामुळे आम्ही जिंकलो आहोत. जर हिंसाचार झाला असता, तर परिस्थिती आणखी बिघडली असती. म्हणूनच मी माझे उपोषण वेळेपूर्वीच संपवल्याचे त्यांनी स्पष्ट केले.

आवाज उठवत राहणार : व्हिडिओ संदेश जारी
रुग्णालयातून घरी सोडण्यापूर्वी सोमवारी सकाळी सोनम वांगचुक यांनी एक व्हिडिओ जारी केला. माझी तब्येत आता खूप सुधारली आहे. मी हळूहळू जेवत आहे आणि माझ्या शरीरात पुन्हा शक्ती येत आहे. स्वित्झर्लंडहून परतल्यानंतर जसे मी उपोषण सुरू करण्यापूर्वी राजघाटावर बापूंचे दर्शन घेतले आणि त्यानंतर जंतर मंतरकडे गेलो होतो त्याचप्रमाणे आज त्याच परंपरेची पुनरावृत्ती होईल. राजघाटावर महात्मा गांधीजींना अभिवादन केल्यानंतर मी लडाखमधील माझ्या घरी परत जाईन.

सर्व स्तरांतील, तरुण-वृद्ध, जवळचे-दूरचे लोक एकत्र येऊन या चळवळीत सामील झाले आहेत. सर्वांच्या पाठिंब्याने ही चळवळ यशस्वी झाली आहे आणि भविष्यातही आम्ही सार्वजनिक मुद्यांवर एकत्र आवाज उठवत राहू, असे त्यांनी आपल्या संदेशात म्हटले आहे.