फेब्रुवारीमध्ये काही नियम बदलणार

थेट व्यवहारांवर परिणाम करणारे बदल :  1 फेब्रुवारीपासून येणार

वृत्तसंस्था/नवी दिल्ली

पुढील महिन्यात म्हणजे 1 फेब्रुवारी 2026 पासून अनेक नियम बदलले जाणार आहेत. या बाबींचा थेट परिणाम लोकांच्या दररोजच्या व्यवहारांवर होणार आहे. या संदर्भातील बदल खालीलप्रमाणे जाणून घेण्याचा प्रयत्न करुया.

फेब्रुवारी 2026 पासून कोणते नवीन नियम आणि बदल लागू होणार?

एलपीजी सिलिंडरच्या किंमती बदलतील

दर महिन्याच्या सुरुवातीला एलपीजी सिलिंडरच्या किंमती बदलतात आणि नवीन किंमती जारी केल्या जाणार आहेत. या प्रकरणात, 1 फेब्रुवारी 2026 पासून एलपीजी सिलिंडरच्या किमतीत बदल होणार आहे. 1 फेब्रुवारी रोजी तेल विपणन कंपन्या नवीन एलपीजी सिलिंडरच्या किमती जाहीर करतील. 19 किलोच्या व्यावसायिक सिलिंडरच्या किमती बऱ्याच काळापासून बदलत आहेत. गेल्या महिन्यातही एलपीजी सिलिंडरच्या किमती 14.50 रुपयांनी कमी करण्यात आल्या होत्या.

सीएनजी-पीएनजी आणि एटीएफच्या नवीन किमती

दरमहा एलपीजी सिलिंडरप्रमाणे तेल कंपन्या सीएनजी-पीएनजी आणि एटीएफच्या किमती बदलतात आणि नवीन किमती जारी करतात.  सीएनजी-पीएनजी आणि एटीएफच्या नवीन किमती 1 फेब्रुवारीपासून लागू होतील.

फास्टॅग वापरकर्त्यांसाठी नवीन नियम

भारतीय राष्ट्रीय महामार्ग प्राधिकरण म्हणजेच एनएचएआयने आता कार, जीप आणि व्हॅनसाठी फास्टॅग जारी करताना केवायसी पडताळणी प्रक्रिया रद्द केली आहे. हा नवीन नियम 1 फेब्रुवारीपासून लागू होईल. 1 फेब्रुवारीपासून फास्टॅग सक्रिय झाल्यानंतर केवायसी पडताळणी केली जाणार नाही. टॅग देण्यापूर्वी वाहनांशी संबंधित सर्व तपासणी पूर्ण करणे आता बँकांची जबाबदारी राहणार आहे.

पान-मसाला, सिगारेट, तंबाखूवरील कर

पुढील महिन्यात 1 फेब्रुवारीपासून पान-मसाला, सिगारेट आणि तंबाखूसारख्या उत्पादनांवरील कर वाढणार आहे. अहवालानुसार, आता या उत्पादनांवर अधिक कर आकारला जाईल. त्यामुळे, पान-मसाला, सिगारेट आणि तंबाखू आता महाग होऊ शकतात. या उत्पादनांवर आकारला जाणारा कर जीएसटीपासून वेगळा असेल. त्यात उत्पादन शुल्क आणि उपकर समाविष्ट आहे.