अमेरिकेचे सहा टेनिसपटू पुढील फेरीत

वृत्तसंस्था/सीनसिनॅटी

एटीपी टूरवरील येथे होणाऱ्या सीनसिनॅटी खुल्या पुरूष आणि महिलांच्या आंतरराष्ट्रीय टेनिस स्पर्धेत पात्र फेरीमध्ये अमेरिकेच्या सहा टेनिसपटूंनी पुढील फेरीत प्रवेश केला.

पात्र फेरीमध्ये पुरूष आणि महिला विभागात मानांकनात आघाडीवर असणाऱ्या नुनो बोर्जेस आणि मॅग्डालेना फ्रेच यांनी शानदार विजय नोंदविले. पोर्तुगालच्या बोर्जेसने ऑस्ट्रेलियाच्या वुकीकचा 7-6(7-4), 6-1 तर महिलांच्या विभागात पोलंडच्या फ्रेचने स्पेनच्या मॅनीरोचा 6-1, 6-4 असा पराभव करत पुढील फेरीत स्थान मिळविले. अमेरिकेच्या तीन पुरूष आणि तीन महिला टेनिसपटूंनी आपले विजय नोंदवित प्रमुख ड्रॉमध्ये स्थान मिळविले. अमेरिकेच्या मिचेलसेनने मॅकडोनाल्डचा 6-3, 6-2, ब्रेंडॉन हॉलने स्वेडाचा 6-4, 2-6, 6-3, कोव्हासेविकने ऑस्ट्रेलियाच्या हिजेकेटाचा 6-1, 7-6(7-5) असा पराभव केला. महिलांच्या विभागात अमेरिकेच्या टाऊनसेंडने व्हॉलीनेटसचा 6-0, 6-3, माँटेगोमेरीने इटलीच्या ट्रिव्हेसेनचा 6-4, 6-4, क्रुजेरने जपानच्या नाओमी ओसाकाचा 6-3, 2-6, 6-3 असा पराभव केला. या स्पर्धेतील पुरूष आणि महिलांचा प्रमुख ड्रॉ बुधवारी काढण्यात येणार आहे. या स्पर्धेत अमेरिकेचे एकूण 12 टेनिसपटू सहभागी झाले आहेत.