युद्धामुळे दुबईत अडकलेली सिंधू सुरक्षित स्वगृही

वृत्तसंस्था/ बेंगळूर

इस्रायल, अमेरिका आणि इराणमधील वाढत्या तणावामुळे दुबईमध्ये अडकल्यानंतर भारतीय बॅडमिंटन स्टार पी. व्ही. सिंधू शेवटी बेंगळूरमध्ये घरी परतली आहे. दोन वेळच्या ऑलिंपिक पदक विजेत्या खेळाडूने ‘एक्स’वरील एका पोस्टमध्ये गेल्या काही दिवसांत तिला भेडसावलेल्या चिंतेची झलक दाखवत तिला मिळालेला दिलासा आणि कृतज्ञता व्यक्त केली आहे.

बेंगळूरमध्ये घरी परतली आहे आणि सुरक्षित आहे. गेले काही दिवस खूप चिंताजनक आणि अनिश्चित होते, परंतु मी माझ्या घरी परतल्याबद्दल खरोखर आभारी आहे. अविश्वसनीय ग्राउंड टीम, दुबईतील अधिकारिणी, विमानतळ कर्मचारी, इमिग्रेशन आणि कठीण काळात आमची इतकी चांगली काळजी घेणाऱ्या प्रत्येक व्यक्तीचे मनापासून आभार. मिळालेली सहानुभूती आणि व्यावसायिकता शब्दांत व्यक्त करता येणार नाही. सध्या विश्रांती घेण्याची, पुन्हा विचार करण्याची आणि पुढील पावले उचलण्याची वेळ आली आहे, असे सिंधूने लिहिले आहे.

दुबईतील भारतीय दूतावास परिस्थितीवर बारकाईने लक्ष ठेवून होता आणि बॅडमिंटन स्टारला पाठिंबा देत होता. रविवारी सिंधूचे वडील पी. व्ही. रमणा म्हणाले होते की, मी आज पहाटे 3 वा. माझ्या मुलीशी बोललो. तिने सांगितले की भारतीय दूतावास तिची काळजी घेत आहे आणि त्यांनी तिला एका हॉटेलमध्ये ठेवले आहे.