निलजी येथे धर्मवीर छत्रपती श्री संभाजी महाराज मूर्तीच्या उद्घाटन सोहळ्याला उद्यापासून प्रारंभ

सांबरा/वार्ताहर

निलजी येथे श्रीराम सेना हिंदुस्थान व ग्रामस्थांच्या वतीने नव्याने उभारण्यात आलेल्या धर्मवीर छत्रपती श्री संभाजी महाराजांच्या मूर्तीच्या उद्घाटन सोहळ्याला रविवार दि. 3 पासून प्रारंभ होणार आहे. दोन दिवस होणाऱ्या उद्घाटन सोहळयात भरगच्च कार्यक्रमांचे आयोजन करण्यात आले आहे.

रविवार दि. 3 रोजी सकाळी 6 वाजता वाजतगाजत जाऊन गावातील सर्व देवीदेवतांचे पूजन करण्यात येणार आहे. सकाळी दहा वाजता धर्मवीर छत्रपती श्री संभाजी महाराजांच्या मूर्तीला अभिषेक घालण्यात येईल. यावेळी चौथरा पूजन व चौकाचे नामकरणही करण्यात येईल. सकाळी 11 वाजता होमपूजन होईल. तर सायंकाळी पाच वाजता ढोलताशा पथकाची प्रात्यक्षिके सादर करण्यात येतील. सायंकाळी सहा वाजता महिला व बालकल्याण मंत्री लक्ष्मी हेब्बाळकर व श्रीराम सेना हिंदुस्थानचे राष्ट्रीय अध्यक्ष रमाकांत कोंडुसकर यांच्या हस्ते मूर्तीचे उद्घाटन करण्यात येणार आहे. याप्रसंगी महाराष्ट्रातील युवा व्याख्याते सुदर्शन शिंदे हे मार्गदर्शन करणार आहेत .

सोमवार दि. 4 रोजी दुपारी 12 वाजता महाप्रसाद वाटपाला प्रारंभ होईल. सायंकाळी पाच वाजता मर्दानी खेळ आयोजित करण्यात आले आहेत. तर रात्री नऊ वाजता भव्य लेझर शो व त्यानंतर ‘पुत्र अमृताचा’ हे महानाट्या सादर करण्यात येणार आहे. तरी सर्व शंभूभक्तांनी या कार्यक्रमाचा लाभ घ्यावा, असे श्री श्रीराम सेना हिंदुस्थान निलजी शाखेच्या वतीने कळविण्यात आले आहे.