कांदोळी येथे आगीत दुकान जळून खाक

दाम्पत्य जखमी; सुमारे 8 लाखाची हानी : दुकानातील दोन गॅस सिलिंडरचा स्फोट

म्हापसा : कांदोळी सेबेस्तियानवाडा येथील पॅरी जनरल स्टोअरला शॉर्टसर्किटमुळे लागलेल्या आगीत परेरा कुटुंबीयांचे भुसारी दुकान जळून खाक झाले. आग लागताच दुकानातील दोन गॅस सिलिंडरचा स्फोट झाला. या दुर्घटनेत वृद्ध दुकान मालक  दाम्पत्य किरकोळ जखमी झाले. आगीत अंदाजे 8 लाख ऊपयांपेक्षा जास्त मालमत्तेची हानी झाली. पिळर्ण अग्निशामक दलाच्या जवानांनी त्वरित घटनास्थळी धाव घेऊन ही आग आटोक्यात आणली. दुकान रस्त्याच्या बाजूलाच असल्याने काही काळ वाहतूक खोळंबली. ही दुर्घटना शुक्रवारी सकाळी 11.52 च्या सुमारास घडली. लॉरेन्स परेरा (68) व इस्बिन परेरा (62) अशी जखमी दाम्पत्याची नावे आहेत. दुकानातील वीज उपकरणांमध्ये अचानक शॉर्टसर्किट होऊन आग लागली. ही आग विझवण्याच्या प्रयत्नात वृद्ध परेरा दाम्पत्य जखमी झाले. आग विझवत असतानाच दुकानातील  दोन गॅस सिलिंडरचा भडका उडाला आणि आगीने संपूर्ण दुकान वेढले. मिळालेल्या माहितीनुसार हे दाम्पत्य दुकानात काहीतरी शिजवत असतानाच ही आग लागली असल्याचे सांगण्यात आले. त्यात आगीचा भडका उडाला व आग सर्वत्र पसरली.

पिळर्ण अग्निशामक दलाच्या जवानांनी घटनास्थळी धाव घेऊन पर्वरी अग्निशामक दलाचे सहकार्य घेत आग आटोक्यात आणली. पिळर्ण अग्निशामक दलाचे उपअधिकारी सनी फायदे, शिला पाटील, भावेश शिरोडकर, राजेश पिरणकर, ऋषिकेश कुबडे, परेश गावस तसेच पर्वरी अग्निशामक दलाचे प्रशांत सावंत व सहकारी जवानांनी ही आग आटोक्यात आणली. कळंगुट पोलिस निरीक्षक अनंत गावकर व सहकारी पोलिसांनी घटनेचा पंचनामा केला. या दुर्घटनेत दुकानातील तीन फ्रीज, इतर सर्व सामान तसेच दुकानाच्या मागच्या बाजूला पार्क केलेली डिओ स्कूटर जळून खाक झाली. त्यामुळे आगीत 8 लाखांपेक्षा जास्त मालमत्तेचे नुकसान झाल्याचा अंदाज अग्निशामक दल आणि पोलिसांनी व्यक्त केला आहे. जखमी वृद्ध दाम्पत्यावर कांदोळीतील बोसिओ हॉस्पिटलमध्ये उपचार करून त्यांना घरी पाठवण्यात आले. घटनेची माहिती मिळताच स्थानिक पंचायत सदस्य दिनेश मोरजकर यांनी घटनास्थळी धाव घेऊन पाहणी केली. अचानक लागलेल्या या आगीत परेरा कुटुंबीयांचे नुकसान झाल्याने दु:ख व्यक्त केले. पंचायतीतर्फे त्यांना आर्थिक मदत देऊ, असे ते म्हणाले.