मोंटेनेग्रोमध्ये गोळीबार, 10 जणांचा मृत्यू

पाडगोरिका : मोंटेनेग्रो या देशातील सेटिनजे शहरात बुधवारी झालेल्या गोळीबारात 10 जण मृत्युमुखी पडले असून मृतांमध्ये दोन मुलांचाही समावेश आहे. तर गोळीबार करणारा आरोपी फरार झाला आहे. पोलिसांनी राजधानी पाडगोरिकापासून 30 किलोमीटर अंतरावरील सेटिनजे शहरात सशस्त्र हल्लेखोराच्या शोधासाठी विशेष पथके पाठविली आहेत. पोलिसांनी हल्लेखोराच्या नावातील प्रारंभिक अक्षरं जाहीर केली आहेत. तसेच हल्लेखोर 45 वर्षांचा असल्याचे म्हटले आहे. या व्यतिरिक्त पोलिसांनी अन्य तपशील देणे टाळले आहे. पोलिसांनी गुन्हेगारी टोळ्यांदरम्यान संघर्षाची शक्यता फेटाळत लोकांना शांतता राखण्याचे आणि घरातच थांबण्याचे आवाहन केले आहे. तसेच हल्लेखोराला पकडण्यासाठी शक्य ते सर्व काही केले जाणार असल्याचे म्हटले आहे.