मालवण शिवाजी वाचन मंदिराच्या स्वरचित काव्य स्पर्धेत मैत्रेयी बांदेकर प्रथम; 23 कवींनी सादर केल्या स्वरचित कविता
स्पर्धेत सहभागी कवींनी आपल्या कवितांमधून सामाजिक प्रश्न, निसर्गाचे महत्त्व आणि मानवी स्वभावातील विविध पैलू प्रभावीपणे मांडले. ‘थेंब थेंब पाणी जपया’ आणि ‘देणं निसर्गाचा’ यांसारख्या कवितांतून पाणी संवर्धन व निसर्गाप्रती कृतज्ञतेचा संदेश देण्यात आला. तर ‘रस्ते तुमचेच आहेत का?’, ‘ओळख भक्षकांची’ आणि ‘मीपणा’ यांसारख्या कवितांमधून सामाजिक वास्तवावर प्रकाश टाकण्यात आला.
स्वतःचे अनुभव, भावना आणि विचार कवितेच्या माध्यमातून व्यक्त करताना कवींनी विषयवैविध्य जपले. त्यांच्या सादरीकरणातून सर्जनशीलता आणि सामाजिक जाणीव यांचा प्रत्यय आला. अशा स्पर्धांमुळे नवोदित तसेच हौशी कवींना आपल्या साहित्यिक प्रतिभेला व्यासपीठ मिळत असल्याचे दिसून आले.
स्पर्धेचा निकाल पुढीलप्रमाणे आहे. प्रथम क्रमांक मैत्रेयी बांदेकर, द्वितीय क्रमांक वैशाली सावजी, तृतीय क्रमांक मधुरा माणगावकर यांनी मिळवला. उत्तेजनार्थ प्रथम क्रमांक मेधा मणेरीकर, तर उत्तेजनार्थ द्वितीय क्रमांक आशिष पेडणेकर यांनी पटकावला.
विजेत्यांना अनुक्रमे 1,500,1,000,750,500 आणि 300 रुपये अशी पारितोषिके व प्रमाणपत्रे देऊन गौरविण्यात आले. स्पर्धेत सहभागी सर्व कवींनाही सहभाग प्रमाणपत्रे देण्यात आली.
स्पर्धेचे परीक्षक म्हणून चारुशीला देऊलकर आणि नूरजहाँ नाईक यांनी काम पाहिले. यावेळी संस्थेचे विश्वस्त अध्यक्ष रुजारीओ पिंटो, कार्यकारिणी अध्यक्ष डॉ. सुभाष दिघे, सदस्य रत्नाकर कोळंबकर यांच्यासह अनेक काव्यप्रेमी उपस्थित होते.
श्री शिवाजी वाचन मंदिराच्या या उपक्रमामुळे मालवणमधील साहित्यिक वातावरणाला चालना मिळाली. स्वरचित कवितांमधून सामाजिक प्रश्न आणि वैयक्तिक भावविश्व व्यक्त करणाऱ्या कवींना प्रोत्साहन देणारी ही स्पर्धा उत्साहात पार पडली.