शार्दुल, जैस्वालचे मुंबई संघात पुनरागमन

वृत्तसंस्था/ मुंबई

कर्णधार शार्दुल ठाकुर आणि भारताचा सलामीवीर यशस्वी जैस्वाल सोमवारी येथे 6 फेब्रुवारीपासून खेळल्या जाणाऱ्या कर्नाटकविरुद्धच्या रणजी ट्रॉफी उपांत्यपूर्व फेरीसाठी मुंबई संघात परतले आहेत.

मुंबईने चार विजय आणि तीन अनिर्णित सामन्यांसह एलिट गट डी मध्ये अव्वल स्थान पटकावले, तर कर्नाटकने गट अ मधील पंजाबविरुद्धच्या रोमांचक विजयासह अंतिम आठमध्ये स्थान मिळवले. मुंबई आणि कर्नाटक यांच्यातील उपांत्यपूर्व फेरीचा सामना 6 ते 10 फेब्रुवारी दरम्यान येथील एमसीए-बीकेसी मैदानावर खेळला जाईल, कारण प्रतिष्ठित वानखेडे स्टेडियमवर 7 फेब्रुवारीपासून टी-20 विश्वचषकाचे सामने होणार आहेत. जैस्वालचा या हंगामातील रणजी ट्रॉफीमध्ये मुंबईसाठी हा दुसरा सामना असेल. यापूर्वी त्याने पहिल्या फेरीत राजस्थानविरुद्ध सामना खेळला होता.रविवारी संपलेल्या गट फेरीच्या दुसऱ्या फेरीत आपली उपलब्धता निश्चित करण्यात अयशस्वी ठरल्याने एमसीए आणि वरिष्ठ निवड समितीने या भारतीय सलामीवीराचा निवडीसाठी विचार केला नव्हता. जैस्वाल टी-20 विश्वचषकासाठी भारतीय संघाचा भाग नाही.दरम्यान, नियमित कर्णधार ठाकुर दुखापतीमुळे अनुपस्थित असताना मुंबईचे नेतृत्व करणाऱ्या सिद्धेश लाडकडून कर्णधारपदाची सूत्रे स्वीकारेल. ठाकुरने दिल्लीविरुद्धच्या गट फेरीच्या शेवटच्या सामन्यात गोलंदाजी करण्यास सुरुवात केली होती, जो सामना अनिर्णित राहिला होता. मुंबई संघ : शार्दुल ठाकुर (कर्णधार), यशस्वी जैस्वाल, मुशीर खान, सर्फराज खान, सिद्धेश लाड, अखिल हेरवाडकर, आकाश आनंद (यष्टीरक्षक), हार्दिक तामोरे (यष्टीरक्षक), साईराज पाटील, शम्स मुलाणी, तनुष कोटियन, तुषार देशपांडे, मोहित अवस्थी, ओंकार तारमाळे, दिव्यांश सक्सेना, सूर्यांश शेडगे.