उत्तेजक चाचणीतून शालू चौधरी दोषमुक्त

वृत्तसंस्था/ नवी दिल्ली

भारताची महिला धावपटू शालू चौधरीवर उत्तेजक चाचणीत दोषी ठरल्याच्या कारणावरून यापूर्वी 4 वर्षांची बंदी घालण्यात आली होती. दरम्यान तिच्या उत्तेजक चाचणीसाठी घेण्यात आलेल्या मूत्रल नमुन्याची डीएनए चाचणी घेतल्यानंतर ते दूषित असल्याचे आढळल्याने तिच्यावर घालण्यात आलेली बंदी तातडीने उठविण्यात आली. आता 30 वर्षीय शालू चौधरी उत्तेजक चाचणीतून दोषमुक्त झाली आहे.

शालू चौधरीची डीएनए चाचणी घेण्यात आली. त्यावेळी या चाचणीमध्ये तिच्याकडून घेण्यात आलेले मूत्रल नमुने दूषित असल्याचे स्पष्ट झाले. शालू चौधरी ही 800 मी. धावण्याच्या शर्यतीतील राष्ट्रीय स्तरावरील पदक विजेती धावपटू आहे. शालू चौधरीने स्टिमूलन आणि पेपटीड हार्मोन्स वाढविण्यासाठी दोन निर्बंध घातलेल्या द्रवांचा वापर केल्याने नाडाने तिच्यावर चार वर्षांची बंदी घातली होती. नाडाच्या शिस्तपालन समितीसमोर तिच्या या प्रकरणाची सुनावणी झाली होती आणि तिच्यावर या पॅनेलने बंदी घालण्याचा निर्णय घेतला होता. शालू चौधरीने यानंतर डीएनए चाचणीची मागणी केली. या चाचणीसाठी नाडाकडून दीड लाख रुपये घेण्यात आले होते. डीएनए चाचणीसाठी लवादाच्या निर्णयानंतर 10 दिवसांची मुदत देण्यात आली होती. या कालावधीत तिची डीएनए चाचणी घेण्यात आली आणि त्यामध्ये ती निर्दोष असल्याचा निर्णय 18 एप्रिल रोजी अधिकृतपणे जाहीर करण्यात आला. आता तिच्याकडून घेण्यात आलेली दीड लाख रुपयांची रक्कम नाडाला परत करण्याचा आदेश देण्यात आला आहे. या प्रकरणी शालू चौधरीला न्यायालयीन प्रक्रियेतून जावे लागले होते.