एसबीआयचा तिमाहीत नफा वाढूनही घसरणीत

वृत्तसंस्था/मुंबई

देशातील सर्वात मोठी सार्वजनिक क्षेत्रातील बँक असलेल्या स्टेट बँक ऑफ इंडिया म्हणजेच एसबीआयच्या शेअर्समध्ये शुक्रवारी मोठी घसरण झाली. मार्च 2026 च्या तिमाहीचे निकाल बाजाराच्या अपेक्षेपेक्षा कमकुवत आल्यानंतर गुंतवणूकदारांनी स्टॉकची विक्री केली. निकालानंतर, बीएसईवर एसबीआयचे शेअर्स 6.5 टक्क्यांनी घसरून 1,019.85 रुपयांवर आले. शेअर्समधील घसरणीचा परिणाम बाजारावरही झाला आणि बीएसई सेन्सेक्स जवळपास 600 अंकांनी घसरला. दुपारी 2 वाजण्याच्या सुमारास, एसबीआयचे शेअर्स सुमारे 5 टक्क्यांच्या घसरणीसह 1,037 रुपयांवर व्यवहार करत होते.

एनआयआय अपेक्षेपेक्षा कमी राहिला

बँकेचे निव्वळ व्याज उत्पन्न (एनआयआय) वार्षिक आधारावर 4.1 टक्क्यांनी वाढून 44,380 कोटी रुपये झाले. मागील वर्षी याच तिमाहीत ते 42,618 कोटी रुपये होते. तथापि, बाजाराला एसबीआयपेक्षा अधिक मजबूत एनआयआय वाढीची अपेक्षा होती. विश्लेषकांनी एनआयआयमध्ये 6 ते 10 टक्क्यांची वाढ अपेक्षित केली होती. यामुळे गुंतवणूकदारांची निराशा वाढली आणि शेअरवर दबाव आला.

मालमत्तेच्या गुणवत्तेत सुधारणा

एसबीआयच्या मालमत्तेच्या गुणवत्तेत सुधारणा दिसून आली आहे. बँकेची एकूण अनुत्पादक मालमत्ता (जीएनपीए) प्रमाण मागील तिमाहीतील 1.57 टक्क्यांवरून घटून 1.49 टक्के झाली आहे. त्याच वेळी, निव्वळ अनुत्पादक मालमत्ता (एनएनपीए) प्रमाण 0.39 टक्क्यांवर स्थिर राहिले आहे.

चौथ्या तिमाहीत किती नफा?

एसबीआयचा जानेवारी-मार्च 2026 तिमाहीतील निव्वळ नफा 19,683.75 कोटी रुपये होता, जो मागील वर्षाच्या याच तिमाहीच्या तुलनेत 5.5 टक्क्यांनी वाढला आहे. तथापि, तिमाही आधारावर बँकेच्या नफ्यात घट झाली आहे. मागील तिमाहीत एसबीआयचा निव्वळ नफा 21,028.15 कोटी रुपये होता.