सांगली हादरली! संशयाच्या आगीत संसार होरपळला; पतीने पत्नीच्या अंगावर रॉकेलसदृश द्रव ओतून पेटवले

सांगली : पत्नीच्या चारित्र्यावर संशय घेऊन तिच्याशी वारंवार वाद घालत मारहाण करणाऱ्या पतीने संतापाच्या भरात तिच्या अंगावर रॉकेलसदृश द्रव ओतून पेटवण्याचा प्रयत्न केल्याची धक्कादायक घटना सांगली-कोल्हापूर रस्त्यावरील हिरा हॉटेलसमोर मंगळवारी दुपारी घडली. या घटनेत उर्मिला जखमी झाल्या असून त्यांच्यावर रुग्णालयात उपचार सुरू आहेत. या प्रकरणी सांगली शहर पोलिसांनी पती देविलाल हिरालाल राठोड (वय 28, रा. सांगली-कोल्हापूर रस्ता, हिरा हॉटेलसमोर, सांगली) याला अटक केली आहे.

या प्रकरणी तेजस मेघराज पवार (रा. माळ बंगल्यासमोर, चिंतामणीनगर झोपडपट्टी, संजयनगर, सांगली) यांनी सांगली शहर पोलिस ठाण्यात फिर्याद दाखल केली आहे.

संशयातून वारंवार वाद

पोलिसांनी दिलेल्या माहितीनुसार, देविलाल राठोड याचा उर्मिला यांच्याशी विवाह झाला आहे. गेल्या काही महिन्यांपासून देविलाल हा पत्नीच्या चारित्र्यावर संशय घेत होता. याच कारणावरून दोघांमध्ये वारंवार वाद होत होते. वाद वाढल्यानंतर देविलालकडून पत्नीला मारहाणही केली जात असल्याचे फिर्यादीत नमूद करण्यात आले आहे.

रॉकेलसदृश द्रव ओतून पेटवण्याचा प्रयत्न

मंगळवारी दुपारी सुमारे एक वाजण्याच्या सुमारास पुन्हा पती-पत्नीमध्ये वाद झाला. यावेळी संतापलेल्या देविलाल याने उर्मिला यांच्या अंगावर रॉकेलसारखा वास येणारा द्रव ओतला. त्यानंतर काडीपेटी पेटवून त्यांच्या अंगावर टाकल्याचा आरोप आहे.

अचानक आग लागल्याने उर्मिला यांनी आरडाओरड केली. त्यावेळी उपस्थित नागरिकांनी प्रसंगावधान राखत आग आटोक्यात आणली. त्यामुळे मोठा अनर्थ टळला; मात्र या घटनेत उर्मिला जखमी झाल्या.

पतीला अटक; पुढील तपास सुरू

घटनेची माहिती मिळताच सांगली शहर पोलिसांनी घटनास्थळी धाव घेतली. जखमी उर्मिला यांना तातडीने रुग्णालयात दाखल करण्यात आले. त्यानंतर पोलिसांनी चौकशी करून देविलाल राठोड याला ताब्यात घेतले. त्याच्याविरुद्ध गुन्हा दाखल करून त्याला अटक करण्यात आली आहे.

चारित्र्याच्या संशयातून पत्नीला पेटवून देण्याचा प्रयत्न झाल्याने परिसरात खळबळ उडाली आहे. या प्रकरणाचा पुढील तपास सांगली शहर पोलिस करीत आहेत.