सावंतवाडीत सुरु होणार सैनिक स्कूल

भोसले सैनिक स्कूलला मान्यता ; १५ नोव्हेंबरला उद्घाटन समारंभ

सावंतवाडी । प्रतिनिधी

संरक्षण मंत्रालय, भारत सरकार आणि सैनिक स्कूल सोसायटी, दिल्ली यांच्या संयुक्त विद्यमाने चालवल्या जाणाऱ्या 'भोसले एज्युकेशन सोसायटी' संचलित भोसले सैनिक स्कूल'ला  अधिकृत मान्यता मिळाली आहे.शैक्षणिक वर्ष २०२६-२७ पासून सहावी आणि नववी इयत्तेत प्रवेश देण्यात येईल. शाळेची एकूण प्रवेश क्षमता १६० विद्यार्थ्यांची असून त्यापैकी ४० जागा विद्यार्थिनींसाठी राखीव आहेत. शाळेचे भूमिपूजन आणि उद्घाटन समारंभ शनिवार, १५ नोव्हेंबर रोजी आयोजित करण्यात आला आहे आणि त्यानंतर औपचारिक प्रवेश प्रक्रिया सुरू होईल. या मान्यतेमुळे कोकण, विशेषतः सिंधुदुर्ग  जिल्ह्यासाठी एक अभिमानास्पद आणि ऐतिहासिक पर्व सुरू झाले आहे. या निमित्ताने आयोजित पत्रकार परिषदेत संस्थेचे कार्याध्यक्ष श्री. अच्युत सावंत भोसले यांनी शनिवारी माहिती दिली. सध्या देशभरात ३३ पारंपरिक सैनिक स्कूल कार्यरत असून त्यांची एकूण प्रवेशक्षमता सुमारे ३,११७ विद्यार्थ्यांची आहे. देशात सैनिकी शिक्षणाच्या कक्षा रुंद करण्यासाठी केंद्र सरकारने अलीकडेच ६९ नवीन सैनिक स्कूल्सना मान्यता दिली आहे. या नवीन शाळा सार्वजनिक-खाजगी भागीदारी (PPP) मॉडेल अंतर्गत कार्यरत होणार असून त्याद्वारे देशभरात आणखी ९,६१७ विद्यार्थ्यांच्या प्रवेश क्षमतेची भर पडणार आहे. परिणामी, पारंपरिक आणि नव्याने मान्यता प्राप्त शाळांसह देशातील सैनिक स्कूल्सची एकूण प्रवेश क्षमता साधारण १२,००० पर्यंत पोहोचणार आहे. संपूर्ण देशभरातून जवळपास दीड लाख विद्यार्थी 'ऑल इंडिया सैनिक स्कूल एन्ट्रन्स एक्झामिनेशन' (AISSEE) द्वारे प्रवेश मिळविण्यासाठी तीव्र स्पर्धा करत असतात. सैनिक स्कूल ही केव्हा शैक्षणिक संस्था नसून लष्करी अधिकारी आणि जबाबदार नागरिक घडवणाऱ्या राष्ट्रीय दर्जाच्या संस्था आहेत. या पार्श्वभूमीवर, भोसले सैनिक स्कूल हे कोकण विभागातील पहिले सैनिक स्कूल म्हणून आपले नाव कोरले जाणार आहे. हे विद्यालय चराटे (ता. सावंतवाडी ) येथील भोसले एज्युकेशन सिटी परिसरात उभारले जात आहे. येथे आधुनिक शिक्षणासोबतच सैनिकी प्रशिक्षण, शिस्तबद्ध जीवनशैली, नेतृत्वगुण आणि राष्ट्रप्रेम यांचा संगम साधला जाणार आहे. प्रामुख्याने ग्रामीण व सर्वसामान्य कुटुंबातील विद्यार्थ्यांना राष्ट्रीय स्तराचे सैनिकी शिक्षण स्थानिक स्तरावर उपलब्ध करणे, हा शाळेचा मुख्य हेतू आहे.या शाळेत प्रवेश AISSEE परीक्षेमार्फत दिला जाईल. शैक्षणिक वर्ष २०२६-२७ पासून सहावी आणि नववी इयत्तेत प्रवेश देण्यात येईल. शाळेची एकूण प्रवेश क्षमता १६० विद्यार्थ्यांची असून त्यापैकी ४० जागा विद्यार्थिनींसाठी राखीव आहेत. या आरक्षणामुळे, भोसले सैनिक स्कूल हे कोकणातील पहिले सहशिक्षणात्मक सैनिक स्कूल ठरणार आहे. हा आरक्षित कोटा महिला सक्षमीकरणाच्या दिशेने एक महत्त्वाचे पाऊल असून, मुलींनाही समान संधी, सैनिकी प्रशिक्षण, शारीरिक तंदुरुस्ती आणि नेतृत्वगुण विकसित करण्याची संधी मिळणार आहे.या शाळेच्या स्थापनेमुळे सिंधुदुर्ग, रत्नागिरी, गोवा आणि कोल्हापूर परिसरातील विद्यार्थ्यांना सैनिकी शिक्षणासाठी आता दूरवर जाण्याची गरज उरणार नाही. स्थानिक विद्यार्थ्यांना आपल्या जिल्ह्यातच राष्ट्रीय दर्जाचे निवासी शिक्षण आणि सैनिकी प्रशिक्षण मिळेल, ज्यामुळे या भागातील विद्यार्थ्यांच्या राष्ट्रीय संरक्षण अकादमी (NDA) आणि इतर संरक्षण सेवांमध्ये प्रवेश मिळविण्याच्या संधी मोठ्या प्रमाणात वाढणार आहेत.भोसले सैनिक स्कूलचा कॅम्पस अत्याधुनिक सुविधांनी सुसज्ज केला जात आहे. येथे शैक्षणिक इमारती, ट्रेनिंग ब्लॉक्स, हॉस्टेल्स, ड्रिल ग्राउंड, स्पोर्ट्स कॉम्प्लेक्स इत्यादींची उभारणी सुरू आहे. शाळेचे भूमिपूजन आणि उद्घाटन समारंभ शनिवार, १५ नोव्हेंबर रोजी आयोजित करण्यात आला आहे आणि त्यानंतर औपचारिक प्रवेश प्रक्रिया सुरू होईल. श्री. अच्युत सावंत भोसले यांनी सांगितले की, "भोसले सैनिक स्कूल हे केवळ एक शैक्षणिक केंद्र नसून, भविष्यातील सैन्य अधिकारी आणि जबाबदार नागरिक घडविण्याचे ध्येयस्थान आहे." श्री यशवंतराव भोसले एज्युकेशन सोसायटीने कोकणातील या पहिल्या सैनिक स्कूलद्वारे महाराष्ट्राच्या शैक्षणिक इतिहासात एक नवे सुवर्णपान लिहिले आहे. असे भोसले म्हणाले यावेळी निवृत्त लेफ्टनंट कर्नल रत्नेश सिन्हा उपस्थित होते त्यांनी सैन्यात अधिकाऱ्यांची आवश्यकता असते सैनिक स्कूलच्या माध्यमातून हे अधिकारी तयार होतील असा विश्वास व्यक्त केला . यावेळी जनसंपर्क अधिकारी नितिन सांडये उपस्थित होते . सैनिक स्कूल साठी प्रवेश प्रक्रिया 9 नोव्हेंबर पासून सुरू होणार आहे ही प्रक्रिया देशपातळीवर असणार आहे जिल्ह्यातील विद्यार्थ्यांनी यासाठी नोंदणी करावी असे आवाहन करण्यात आले