अँटिलिया स्फोटक प्रकरणात माजी पोलीस अधिकारी सचिन वाझेला जामीन; साडेपाच वर्षांनंतर तुरुंगातून बाहेर पडण्याचा मार्ग मोकळा
मुंबई : उद्योगपती मुकेश अंबानी यांच्या ‘अँटिलिया’ निवासस्थानाबाहेर स्फोटकांनी भरलेली स्कॉर्पिओ आढळल्याच्या प्रकरणात माजी पोलीस अधिकारी सचिन वाझे यांना न्यायालयाने जामीन मंजूर केला आहे. सुमारे साडेपाच वर्षांपासून कारागृहात असलेल्या वाझे यांच्यासाठी हा निर्णय महत्त्वाचा ठरला आहे. मात्र, त्यांच्याविरोधात अन्य प्रकरणेही प्रलंबित असल्याने या जामिनामुळे त्यांची तात्काळ सुटका होईलच असे नाही.
25 फेब्रुवारी 2021 रोजी दक्षिण मुंबईतील अँटिलिया या निवासस्थानाबाहेर एक बेवारस स्कॉर्पिओ आढळली होती. या वाहनात जिलेटिनच्या कांड्या आणि धमकीचे पत्र सापडल्याने खळबळ उडाली होती. त्यानंतर काही दिवसांनी वाहनमालक मनसुख हिरेन यांचा मृतदेह आढळून आला. या दोन्ही घटनांचा तपास राष्ट्रीय तपास यंत्रणेकडे (NIA) सोपवण्यात आला.
या प्रकरणात सचिन वाझे यांच्यासह माजी पोलीस अधिकारी प्रदीप शर्मा आणि अन्य आरोपींविरोधात आरोप निश्चित करण्यात आले आहेत. वाझे यांच्यावर अँटिलिया प्रकरणासोबतच मनसुख हिरेन हत्या प्रकरणातही आरोप आहेत.
दीर्घकाळ कारागृहात राहिल्याचा मुद्दा जामीन अर्जाच्या सुनावणीदरम्यान महत्त्वाचा ठरल्याचे सांगण्यात येत आहे. न्यायालयाने जामीन मंजूर केला असला तरी इतर प्रकरणांमध्ये वाझे आरोपी असल्यामुळे त्यांची प्रत्यक्ष कारागृहातून सुटका होण्याबाबत अद्याप परिस्थिती स्पष्ट नाही.
अँटिलिया प्रकरणाच्या तपासानंतर देशभरात सचिन वाझे यांचे नाव चर्चेत आले होते. या प्रकरणातील पुढील न्यायालयीन प्रक्रिया आणि वाझे यांच्या सुटकेबाबत आता लक्ष लागले आहे.