इंधन शुल्क कपातीमुळे नागरिकांना दिलासा

केंद्र सरकारच्या निर्णयाचे मुख्यमंत्र्यांकडून स्वागत : तेल वितरक कंपन्यांना आधार मिळणार

पणजी : केंद्र सरकारकडून पेट्रोल आणि डिझेलवरील उत्पादन शुल्कात अनुक्रमे 13 रुपयांवरून 3 रुपये प्रति लिटर आणि 10 रुपयांवरून शून्य करण्याच्या निर्णयाचे मुख्यमंत्री प्रमोद सावंत यांनी स्वागत केले आहे. हे बदल 26 मार्च 2026 पासून लागू झाले आहेत. जागतिक कच्च्या तेलाच्या वाढत्या किमतींच्या पार्श्वभूमीवर हा निर्णय स्वागतार्ह असून इंधन शुल्कातील कपातीमुळे नागरिकांना दिलासा मिळेल, इंधनाच्या किंमती स्थिर राहण्यास मदत होईल आणि वाढत्या जागतिक कच्च्या तेलाच्या किंमतींमुळे दबावाखाली असलेल्या तेल वितरक कंपन्यांना आधार मिळेल, असे म्हटले आहे.

इराणसोबत सुरू असलेल्या अमेरिका-इस्रायल संघर्षामुळे निर्माण झालेल्या वाढत्या जागतिक ऊर्जा चिंतेच्या पार्श्वभूमीवर ग्राहकांवरील भार कमी करण्याच्या उद्देशाने हा महत्त्वाचा निर्णय घेत केंद्र सरकारने पेट्रोल आणि डिझेलवरील विशेष अतिरिक्त उत्पादन शुल्कात लक्षणीय कपात केली आहे. केंद्राने विमान इंधन शुल्कावर एक नवीन विशेष अतिरिक्त उत्पादन शुल्क लागू केले आहे. लागू असलेल्या सवलतींनंतर, प्रभावी शुल्क 29.5 रुपये प्रति लिटर झाले आहे. आंतरराष्ट्रीय घडामोडींचा इंधन बाजारांवर परिणाम होत असताना सुधारित शुल्क रचनेमुळे ग्राहक आणि इंधन क्षेत्र या दोघांनाही फायदा होईल, असा विश्वास मुख्यमंत्र्यांनी व्यक्त केला.