शबरीमाला सोने चोरीप्रकरणी गुन्हा नोंदवा!

केरळ उच्च न्यायालयाचा आदेश : एसआयटीला सहा आठवड्यात तपास अहवाल सादर करण्याचे निर्देश

वृत्तसंस्था/तिरुवनंतपुरम

केरळच्या प्रसिद्ध शबरीमाला मंदिरातून कोट्यावधी रुपयांचे सोने गूढपणे गायब झाले आहे. मंदिर प्रशासनाला या घटनेची माहिती मिळताच गोंधळ उडाला. आता हे प्रकरण उच्च न्यायालयात पोहोचले असून न्यायमूर्तींनी चौकशीचे आदेश दिले आहेत. याप्रकरणी तीन आठवड्यांत अहवाल मागितला असून त्रावणकोर देवस्वोम बोर्डाला पूर्ण सहकार्य करण्याचे निर्देश देण्यात आले आहेत. यासंबंधी शुक्रवारी केरळ उच्च न्यायालयाने गुन्हा नोंदवण्याचे आदेश देतानाच एसआयटीला सहा आठवड्यात तपास अहवाल सादर करण्याची सूचना केली आहे.

शबरीमाला मंदिराच्या प्रवेशद्वारावर ठेवलेल्या दोन मूर्तींमधून (द्वारपालकांमधून) सोने गायब झाल्याचे प्रकरण उघड झाले आहे. याप्रकरणी न्यायालयाने फौजदारी खटला नोंदवण्याचे आणि विशेष तपास पथकाला (एसआयटी) कसून तपास सुरू करण्याचे आदेश दिले. न्यायमूर्ती राजा विजयराघवन व्ही आणि के. व्ही. जयकुमार यांच्या खंडपीठाने एसआयटीला दर दोन आठवड्यांनी तपासाचा स्थिती अहवाल सादर करण्याचे निर्देश दिले. याप्रसंगी तपासाशी संबंधित कोणतीही माहिती लीक होऊ नये असे न्यायालयाने म्हटले आहे.

सोने गायब होण्याचे हे प्रकरण मंदिराच्या सोन्याच्या मुलामा देण्याच्या कामाशी संबंधित आहे. 2019 मध्ये शबरीमाला मंदिराच्या गर्भगृहावर (सन्निधानम) सोन्याचा मुलामा देण्याचे काम सुरू झाले. यासाठी मंदिरातून सुमारे 42 किलो सोने नेण्यात आले. योजनेनुसार, या सोन्याच्या प्लेट्स एका विशेष प्रक्रियेचा वापर करून पुन्हा प्लेट केल्यानंतर गर्भगृहात पुन्हा स्थापित केल्या जाणार होत्या. तथापि, जेव्हा प्लेट्स परत आणून मंदिरात स्थापित केल्यानंतर एक धक्कादायक सत्य उघड झाले. या सोन्याचे एकंदर वजन सुमारे 38 किलोपर्यंत कमी झाले होते. म्हणजेच अंदाजे 4.45 किलो सोने गायब झाल्याचा प्रकार उघडकीस आला होता.

केरळ उच्च न्यायालयाने हे प्रकरण गांभीर्याने घेत जर हे पेट्रोल असते तर वजन कमी होणे समजण्यासारखे आहे, परंतु हे सोने आहे. त्याचे वजन कसे कमी झाले? असे न्यायालयाने म्हटले आहे. मंदिरांशी संबंधित श्रद्धा आणि पारदर्शकतेशी तडजोड करता येणार नाही असे सांगत न्यायालयाने देवस्वोम व्हिजिलन्सकडून चौकशीचे आदेश दिले.

अन्य संरचनांचीही तपासणी होणार

उच्च न्यायालयाने केवळ सोन्याच्या प्लेटिंगमधील अनियमिततेवर प्रश्नचिन्ह उपस्थित केले नाही तर द्वारपालक मूर्ती आणि मंदिरातील इतर संरचनांच्या सुरक्षेची त्वरित तपासणी करण्याचे आदेश दिले. न्यायालयाने या सर्व वस्तू स्ट्राँगरुममध्ये सुरक्षितपणे ठेवल्या आहेत याची खात्री करण्यास सांगितले. शबरीमाला मंदिरात सोन्याचा मुलामा देण्याचा प्रकल्प वादात सापडण्याची ही पहिलीच वेळ नाही. यापूर्वीही या प्रकल्पाच्या खर्चाबाबत आणि अंमलबजावणीबाबत प्रश्न उपस्थित करण्यात आले आहेत. आता चार किलो सोन्याच्या गूढ कमतरतेमुळे मंदिर प्रशासनाबाबत गंभीर प्रश्न उपस्थित झाले आहेत.