‘आरसीबी’चा आज लखनौशी मुकाबला

वृत्तसंस्था/लखनौ

इंडियन प्रीमियर लीगमध्ये आज शुक्रवारी आरसीबी व एलएसजी हे दोन्ही संघ आमनेसामने येतील तेव्हा रॉयल चॅलेंजर्स बेंगळूर आपली प्ले-ऑफची पात्रता निश्चित करण्याचा प्रयत्न करेल, तर संघर्षरत लखनौ सुपर जायंट्स स्पर्धेतील आव्हान जिवंत ठेवण्याचे लक्ष्य बाळगेल. एलएसजीचा कर्णधार रिषभ पंतवर प्रत्येक सामन्यागणिक दबाव वाढत आहे. त्याची धावांची कमतरता संघाच्या घसरणीशी जुळत आहे. एलएसजीने गेल्या पाचपैकी चार सामने गमावले आहेत आणि उर्वरित तीन सामने जिंकल्यासच त्यांना फक्त 16 गुण मिळू शकतात. प्ले-ऑफ शर्यतीत 18 गुण हा एक सुरक्षित आकडा आहे आणि आरसीबीने त्यांच्या गेल्या सहा सामन्यांपैकी पाच जिंकलेले असल्याने त्या टप्य्यात पोहोचण्याची त्यांना चांगली संधी आहे. आयपीएल लिलावात सर्वाधिक मानधन घेणारा खेळाडू बनलेल्या पंतसाठी हा हंगाम आतापर्यंत विसरण्यासारखा राहिला आहे. त्याने वेगवेगळ्या स्थानांवर फलंदाजी करण्याचा प्रयत्न केला आहे, परंतु सातत्य त्याला दाखवता आलेले नाही. त्याचा 99.92 हा स्ट्राईक रेट या हंगामातील त्याच्या संघर्षाची साक्ष देतो. एलएसजी त्यांच्या पहिल्या तीन फलंदाजांवर म्हणजे मिशेल मार्श, एडन मार्करम आणि निकोलस पूरन यांच्यावलर खूप अवलंबून आहे.

परंतु स्पर्धेत पुढे जायचे असेल, तर त्यात बदल होणे आवश्यक आहे. गोलंदाजीच्या आघाडीवरही ते खूप सुधारणा करू शकतात. दुखापतग्रस्त वेगवान गोलंदाज मयंक यादव त्याच्या पुनरागमनानंतर महागडा ठरला आहे. संघाचे क्षेत्ररक्षण आणि झेल पकडणे देखील अपेक्षेप्रमाणे प्रभावी राहिलेले नाही. दुसरीकडे, आरसीबीने आयपीएलच्या इतिहासातील त्यांच्या सर्वांत उत्कृष्ट मोहिमांपैकी एकाचा आनंद घेतला आहे. विराट कोहलीने 11 डावांमध्ये सात अर्धशतके झळकावत सातत्यपूर्ण कामगिरी करणे चालू ठेवले आहे. तो पाया घालून देतो आणि रजत पाटीदार आणि अलीकडचा विचार करता रोमारियो शेफर्डसारखे खेळाडू शेवटच्या षटकांत त्यावर कळस चढवतात. या हंगामात सूर गवसलेल्या आणि जखमी झालेल्या देवदत्त पडिक्कलच्या जागी मयंक अग्रवाल संघात सामील झाला आहे. त्यांची कृणाल पंड्या आणि सुयश शर्मा ही फिरकी जोडी खूप प्रभावी ठरली आहे, तर जोश हेझलवूड आणि यश दयाल यांनी कठीण षटकांमध्ये सहज वेगवान गोलंदाजी केली आहे. आरसीबीला रोखण्यासाठी एलएसजीला आज काही तरी खास करावे लागेल.

लखनौ सुपर जायंट्स : रिषभ पंत (कर्णधार), निकोलस पूरन, रवी बिश्नोई, मयंक यादव, आयुष बडोनी, डेव्हिड मिलर, एडन मार्करम, मिचेल मार्श, आवेश खान, अब्दुल समद, आर्यन जुयाल, आकाश दीप. हिम्मत सिंग, मणिमरन सिद्धार्थ, दिग्वेश सिंग, शाहबाज अहमद, आकाश सिंग, शामर जोसेफ, प्रिन्स यादव, युवराज चौधरी, आर. एस. हंगरगेकर, अर्शीन कुलकर्णी, मॅथ्यू ब्रीट्झके, मोहसीन खान.

रॉयल चॅलेंजर्स बेंगळूर : रजत पाटीदार (कर्णधार), विराट कोहली, स्वस्तिक चिकारा, मयंक अग्रवाल, जितेश शर्मा, फिलिप सॉल्ट, मनोज भंडागे, टीम डेव्हिड, कृणाल पंड्या, लियाम लिव्हिंगस्टोन, रोमॅरियो शेफर्ड, जेकब बेथेल, स्वप्नील सिंग, भुवनेश्वर कुमार, जोश हेझलवूड, नुवान तुषारा, लुंगी एनगिडी, यश दयाल, रसिक दार सलाम, सुयश शर्मा, मोहित राठी, अभिनंदन सिंग.

सामन्याची वेळ : सायंकाळी 7.30 वा.