हलगा, बस्तवाड, मच्छे, पिरनवाडी भागात रंगपंचमी उत्साहात

वार्ताहर/किणये 

तालुक्याच्या काही गावांमध्ये मंगळवारी रंगपंचमी उत्साहात साजरी करण्यात आली. मच्छे, पिरनवाडी, हलगा, बस्तवाड या गावांमध्ये मोठ्या जल्लोषात रंगोत्सव साजरा करण्यात आला. पारंपरिक ढोल ताशा व डॉल्बीच्या तालावर तरुणाई थिकरताना दिसून आली. एकमेकांना रंग लावून होळीच्या शुभेच्छा देण्यात आल्या. पारंपरिक पद्धतीने बस्तवाड, हालगा, मच्छे व पिरनवाडी गावातील हकदार, पंच कमिटी व पुजारी यांच्यावतीने मंगळवारी सकाळी होळी कामाणा व देवतांची पूजा करण्यात आली. हलगी व पारंपरिक वाद्यांचा गजर करून रंगोत्सवाला सुरुवात झाली. यानंतर गावांमध्ये रंग खेळण्यास सुरुवात करण्यात आली. गल्ल्यागल्ल्यांमध्ये तसेच ठिकठिकाणी चौकात तरुणांनी डॉल्बी व ढोल ताशांची सोय केली होती. विविध गाण्यांच्या तालावर तरुणाई नृत्य सादर करताना दिसत होती. ठिकठिकाणी पाण्याच्या टाक्या उभारून पाण्याची फवारणी करण्यात येत होती. त्यामुळे तरुणाई रंगात न्हाऊन गेली होती.