बजाज फिनसर्व्हच्या संचालक मंडळातून राजीव बजाज बाहेर पडणार

वाहन क्षेत्रावर लक्ष केंद्रीत करणार : बजाज यांचा निर्णय संचालक मंडळाला मान्य

वृत्तसंस्था, मुंबई

बजाज ऑटोचे व्यवस्थापकीय संचालक राजीव बजाज आता बजाज फिनसर्व्हच्या संचालक मंडळाचा भाग राहणार नाहीत. कंपनीने शेअर बाजाराला कळवले आहे की, आगामी वार्षिक सर्वसाधारण सभेत संचालक पदासाठीच्या पुनर्निवडणुकीत न उतरण्याचा निर्णय राजीव बजाज यांनी घेतला आहे. 31 जुलै रोजी होणाऱ्या वार्षिक सर्वसाधारण सभेत क्रमानुसार सेवानिवृत्त झाल्यानंतर ते कंपनीच्या संचालक पदावरून पायउतार होणार असल्याची माहिती आहे.

वाढलेल्या जबाबदारीमुळे निर्णय

कंपनीच्या म्हणण्यानुसार, गेल्या काही वर्षांत बजाज ऑटोमधील त्यांच्या जबाबदाऱ्या लक्षणीयरीत्या वाढल्या आहेत. बजाज ऑटो टेक्नॉलॉजी आणि बजाज ऑटो क्रेडिट यांसारख्या नवीन कंपन्या स्थापन करण्याव्यतिरिक्त, केटीएमच्या अधिग्रहणामुळे अलीकडे त्यांच्या कामाची व्याप्ती वाढली आहे. त्यामुळे, त्यांनी इतर व्यावसायिक जबाबदाऱ्या कमी करण्याचा निर्णय घेतला आहे, जेणेकरून ते ऑटो व्यवसायावर अधिक लक्ष केंद्रित करू शकतील.

संचालक मंडळाचे आभार

बजाज फिनसर्व्हच्या संचालक मंडळाने राजीव बजाज यांचा निर्णय स्वीकारला असून, कंपनीसोबतच्या त्यांच्या दीर्घ सहवासाबद्दल आणि योगदानाबद्दल त्यांचे आभार मानले आहेत. कंपनीच्या प्रगतीमध्ये त्यांनी महत्त्वाची भूमिका बजावली आहे, असे संचालक मंडळाने म्हटले आहे.

बजाज फायनान्सच्या संचालक मंडळातूनही बाहेर

यापूर्वी एप्रिलमध्ये, राजीव बजाज यांनी बजाज फायनान्सच्या संचालक मंडळातून बाहेर पडण्याचा निर्णय घेतला होता. त्यांनी असेही कळवले होते की, ते तेथील गैर-कार्यकारी संचालक पदाची निवडणूक लढवणार नाहीत. यामुळे, बजाज फायनान्सच्या संचालक मंडळासोबतचा त्यांचा दीर्घ सहवासही संपुष्टात येईल.

राजीव बजाज कोण आहेत?

राजीव बजाज हे देशातील आघाडीची दुचाकी उत्पादक कंपनी असलेल्या बजाज ऑटोचे व्यवस्थापकीय संचालक आहेत. ते उद्योगपती राहुल बजाज यांचे सुपुत्र आहेत, ज्यांनी बजाज ऑटोला देशातील सर्वात मोठ्या ऑटो ब्रँडपैकी एक बनवले. राजीव बजाज हे बजाज फिनसर्व्हचे अध्यक्ष आणि व्यवस्थापकीय संचालक संजीव बजाज यांचे बंधू आहेत.