पोटनिवडणुकीपूर्वी केरळमध्ये छापे

हॉटेलमधील काँग्रेस नेत्यांच्या खोल्यांमध्ये तपासणी

वृत्तसंस्था/ कोची

केरळ पोटनिवडणुकीपूर्वी मंगळवारी रात्री उशिरा पोलिसांनी महिला काँग्रेस नेत्यांच्या खोल्यांवर छापे टाकले. पलक्कड येथे निवडणूक प्रचारासाठी आलेले काँग्रेस नेते बिंदू कृष्णा आणि शनिमोल उस्मान एका हॉटेलमध्ये थांबले होते. यावेळी पोलिसांनी त्यांच्या खोल्यांची झडती घेतली. निवडणुकीच्या प्रचारात काळा पैसा वापरला जात असल्याचा पोलिसांना संशय आहे. मात्र, पोलिसांना तपासात काहीही मिळाले नाही. या छाप्यांच्या निषेधार्थ काँग्रेस नेत्यांनी बुधवारी पोलीस प्रमुख कार्यालयाबाहेर निषेध मोर्चा काढला. हॉटेलमधील सीसीटीव्ही फुटेज तपासण्याची मागणी त्यांनी केली आहे.

भाजप नेत्यांच्या खोल्यांची झडती घेण्यात आली नाही, असा आरोप काँग्रेसने केला आहे. हॉटेलमध्ये भाजपचे नेतेही उपस्थित होते, मात्र पोलिसांनी त्यांची झडती घेतली नाही. झडतीदरम्यान भाजप आणि मार्क्सवादी कम्युनिस्ट पक्षाचे (सीपीआयएम) नेते हॉटेलमध्ये पोहोचले होते. पण त्यांची सुरक्षा यंत्रणांनी तपासणी केली नसल्याचा दावा काँग्रेसने केला आहे. मात्र, हॉटेलच्या 12 खोल्यांची झडती घेण्यात आल्याचे पोलिसांनी सांगितले. ही नियमित तपासणी असून सर्व पक्षांच्या नेत्यांच्या खोल्या तपासण्यात आल्या. केरळ पोटनिवडणुकीत गडबड होऊ नये यासाठी हॉटेल्स आणि लॉजमध्ये झडती घेतल्याचे सांगण्यात आले.