एसआयआर प्रक्रियेवर प्रश्नचिन्ह; पुण्यातील पिंपळे गावात ९० हून अधिक मतदारांच्या नोंदीवर आक्षेप

इंदापूर : इंदापूर तालुक्यातील पिंपळे गावातील मतदार यादीत मोठ्या प्रमाणात विसंगती आढळल्याचा आरोप भाजप नेते प्रदीप गारटकर यांनी केला आहे. पिंपळे येथील बूथ क्रमांक २० मध्ये सुमारे ९० ते ९२ मतदारांची नावे चुकीच्या पद्धतीने मॅप करण्यात आल्याचा दावा त्यांनी पत्रकार परिषदेत केला.

निवडणूक आयोगाच्या विशेष सखोल पुनरीक्षण (SIR) प्रक्रियेत मतदार यादी अधिक अचूक व पारदर्शक करण्यासाठी मतदारांच्या नोंदींची पडताळणी करण्यात येत आहे. पुणे जिल्ह्यात या प्रक्रियेंतर्गत सुमारे ९०.८० लाख मतदारांच्या नोंदींची घरभेटीद्वारे पडताळणी करण्यात आली आहे.

गारटकर यांनी सांगितले की, पिंपळे गावातील काही मुलींचे विवाह होऊन त्या बारामती येथे स्थलांतरित झाल्या आहेत. मात्र, त्यांची नावे पिंपळे तसेच बारामती येथील मतदार यादीत कायम असल्याचा दावा त्यांनी केला. एकाच बूथवर इतक्या मोठ्या प्रमाणात नोंदींमध्ये विसंगती कशी निर्माण झाली, असा सवाल त्यांनी उपस्थित केला.

दरम्यान, ३१ ऑगस्ट २०२६ रोजी SIR ची प्रारूप मतदार यादी प्रसिद्ध करण्यात आली असून, मतदारांना त्यातील नोंदी तपासून दावे व हरकती नोंदविण्याची संधी देण्यात आली आहे. पुणे जिल्हा प्रशासनाच्या माहितीनुसार, इंदापूर विधानसभा मतदारसंघासाठीही SIR प्रारूप मतदार यादी उपलब्ध करून देण्यात आली आहे.

कार्यकर्ते हरकती नोंदवण्यासाठी गेल्यानंतर काही ठिकाणी संबंधित अधिकाऱ्यांकडून योग्य प्रतिसाद मिळत नसल्याचा आरोपही गारटकर यांनी केला. त्यामुळे SIR प्रक्रियेच्या अंमलबजावणीबाबत प्रश्न निर्माण होत असल्याचे त्यांनी म्हटले.

“SIR प्रक्रियेत मतदार यादीतील दुबार, स्थलांतरित अथवा चुकीच्या नोंदींची योग्य पडताळणी होणे आवश्यक आहे. पिंपळे गावातील या प्रकरणाची चौकशी करून संबंधित नोंदी तातडीने दुरुस्त कराव्यात,” अशी मागणी गारटकर यांनी केली.

या प्रकरणाची चौकशी करून दोषींवर कारवाई न झाल्यास तीव्र जनआंदोलन उभारण्याचा इशाराही त्यांनी दिला. दरम्यान, SIR प्रक्रियेत चुकीची नोंद आढळल्यास मतदारांनी संबंधित यादी तपासून दावे किंवा हरकती दाखल करण्याचे आवाहन प्रशासनाकडून करण्यात आले आहे.