राज्य कबड्डी असोसिएशनची चौवार्षिक निवडणूक 21 जुलैला

वार्षिक सर्वसाधारण सभेत अध्यक्ष अजित पवार यांची घोषणा

प्रतिनिधी/ कोल्हापूर

महाराष्ट्र राज्य कबड्डीअसोसिएशनची चौवार्षिक निवडणूक ही 21 जुलै रोजी होईल. या निवडणुकीची प्रक्रिया केंद्र सरकारच्या स्पोर्टस् कोड-2011 या कायद्यानुसार राबवली जाणार असल्याचे असोसिएशनचे अध्यक्ष अजित पवार यांनी मंगळवारी जाहीर केले. मुंबईतील शिवाजी पार्क येथील राज्य असोसिएशनच्या कबड्डी महर्षी स्वर्गीय शंकरराव (बुवा) साळवी सभागृहात आयोजित केलेल्या 64 व 65 व्या संयुक्त वार्षिक सर्वसाधारण सभेत ते अध्यक्षस्थानावऊन बोलत होते. सभेच्या प्रारंभी विषय पत्रिकेवरील सर्व विषयांची मांडणी करण्यात आली. त्याला सर्वानुमते मंजुरी मिळाली. यानंतर सभेला संबोधताना पवार यांनी राज्य असोसिएशनच्या कामकाजाचा आढावा घेतला. तसेच निवडणुकीसाठी निवृत्त न्यायधीश दिलीप जोशी यांची निवडणूक अधिकारी म्हणून निवड केल्याची घोषणाही पवार यांनी यावेळी केली. सभेला असोसिएशनचे पदाधिकारी, प्रतिनिधी, आजीव सदस्य, खेळाडू असे दोनशेहून अधिकजण उपस्थित होते. कोषाध्यक्ष मंगल पांडे यांनी स्वागत केले. सहकार्यवाह रवींद्र देसाई यांनी दिवंगताच्या श्रद्धांजलीचा ठराव मांडला. यावेळी असोसिएशनचे मुंबई शहराध्यक्ष आमदार भाई जगताप, माजी आमदार दिनकर पाटील, आमदार अमरसिंह पंडित, शकुंतला खटावकर आदी मान्यवर उपस्थित होते.