पुनिया, सुजीतला पात्र फेरी स्पर्धा हुकली

वृत्तसंस्था/ नवी दिल्ली

किर्गीजस्तानमध्ये बिश्केक येथे सुरू असलेल्या पॅरीस ऑलिम्पिकसाठीच्या शेवटची आशियाई पात्र फेरी कुस्ती स्पर्धा भारताचे मल्ल दीपक पुनिया आणि सुजीत कलाकल यांना हुकली आहे. या स्पर्धेसाठी ते ाकिर्गीजस्तानला रवाना झाले होते पण दुबईमध्ये खराब हवामानामुळे त्यांचे विमान किर्गीजस्तानच्या राजधानीत उशिरा पोहोचले. दुबईमध्ये मुसळधार पाऊस झाल्याने विमानतळावर पाणी साचले होते. त्यामुळे हवाई उ•ाण थांबविण्यात आले होते. पुनिया आणि सुजीत बिश्केक येथे पोहोचण्यापूर्वी स्पर्धेला प्रारंभ झाला होता. दरम्यान भारतीय मल्लांच्या प्रशिक्षकांनी स्पर्धा आयोजकांकडे झालेल्या समस्येची माहिती देऊन त्यांना संधी द्यावी, अशी विनंती केली. पण स्पर्धा आयोजकांनी ती फेटाळल्याने पुनिया आणि सुजीत यांना ही पात्र फेरीची स्पर्धा पुर्णपणे हुकली आहे. आता पॅरीस ऑलिम्पिकसाठी शेवटची पात्र फेरीची स्पर्धा मे महिन्यात तुर्की येथे होणार आहे. या स्पर्धेत भारताच्या या दोन्ही मल्लांना आपल्या पात्रतेसाठी शेवटची संधी राहिल.