मेघना गुलजारच्या चित्रपटात पृथ्वीराजची एंट्री

दक्षिणेतील अत्यंत गुणवान अभिनेता

हिंदी चित्रपटसृष्टीतील दिग्गज दिग्दर्शिका मेघना गुलजारचा आगामी चित्रपट मागील काही काळापासून चर्चेत आहे. करिना कपूरची मुख्य भूमिका असलेल्या या चित्रपटाचे नाव ‘दायरा’ असणार आहे. या चित्रपटात आता दाक्षिणात्य अभिनेत्याची एंट्री झाली आहे.

पृथ्वीराज सुकुमारन या चित्रपटात दिसून येणार आहे. मेघना गुलजारचा हा चित्रपट सत्यघटनेवर आधारित असल्याचे समजते. चित्रपटात पृथ्वीवराज हा एका पोलीस अधिकाऱ्याच्या भूमिकेत दिसून येणार आहे. चित्रपटाच्या कहाणीला पृथ्वीराजकडून पसंती मिळाली आहे. करिना आणि मेघनासोबत पृथ्वीराज हा या चित्रपटाचे चित्रिकरण लवकरच सुरू करणार आहे.

पृथ्वीराज यापूर्वी अली अब्बास जफरचा चित्रपट ‘बडे मियां छोटे मियां’मध्ये दिसून आला होता. या चित्रपटात अक्षय कुमार आणि टायगर श्रॉफ मुख्य भूमिकेत होते. तर मेघनाने यापूर्वी सॅम बहादुर या चित्रपटाचे दिग्दर्शन केले होते, यात विक्की कौशलने फिल्ड मार्शल सॅम माणेकशॉ यांची व्यक्तिरेखा साकारली होती.