पंतप्रधान मोदी इंडोनेशियात दाखल

अध्यक्ष प्रबावो सुबियांतो यांनी केले स्वागत : सर्वात मोठ्या हिंदू मंदिराला भेट देणार

वृत्तसंस्था/ जकार्ता

पंतप्रधान नरेंद्र मोदी सोमवारी इंडोनेशियात दाखल झाले. पंतप्रधान झाल्यापासूनचा हा त्यांचा तिसरा दौरा आहे. विमानतळावर अध्यक्ष प्रबावो सुबियांतो यांनी त्यांचे स्वागत केले. दोन्ही नेत्यांमधील द्विपक्षीय बैठकीत सुमारे 2,500 कोटी रुपयांच्या ब्रह्मोस सुपरसॉनिक क्रूझ क्षेपणास्त्र करारावर शिक्कामोर्तब होण्याची शक्यता आहे.

या दौऱ्यादरम्यान पंतप्रधान मोदी इंडोनेशियातील सर्वात मोठे हिंदू मंदिर असलेल्या प्रंबननलाही भेट देणार आहेत. नवव्या शतकात बांधलेले हे मंदिर भगवान शिव, विष्णू आणि ब्रह्मा यांना समर्पित असून युनेस्कोच्या जागतिक वारसा यादीत समाविष्ट आहे. इंडोनेशियामध्ये जगातील सर्वाधिक मुस्लीम लोकसंख्या आहे, परंतु त्यांच्या सांस्कृतिक वारशावर अजूनही हिंदू-बौद्ध संस्कृतीचा खोलवर प्रभाव आहे. येथे रामलीला सादर केली जाते आणि देशाच्या चलनी नोटांवर गणपतीचे चित्रही छापण्यात आले आहे.

भारत आणि इंडोनेशिया यांच्यातील सुमारे 2,500 कोटी रुपयांच्या ब्रह्मोस सुपरसॉनिक क्रूझ क्षेपणास्त्र प्रणालीचा संभाव्य करार हा पंतप्रधान मोदींच्या दौऱ्यातील एक प्रमुख अजेंडा मानला जातो. जर हा करार अंतिम झाला, तर इंडोनेशिया फिलिपाईन्सनंतर ब्रह्मोस क्षेपणास्त्र खरेदी करणारा दुसरा परदेशी ग्राहक बनू शकतो. ब्रह्मोस क्षेपणास्त्र भारताची डीआरडीओ आणि रशियाची एनपीओ माशिनोस्ट्रोयेनिया यांच्या संयुक्त उपक्रम असलेल्या ब्रह्मोस एरोस्पेसने विकसित केले आहे. हे जगातील सर्वात वेगवान कार्यरत सुपरसॉनिक क्रूझ क्षेपणास्त्रांपैकी एक मानले जाते.

पंतप्रधान मोदींना विशेष राजकीय सन्मान

विमान उतरण्यापूर्वी इंडोनेशियन हवाई दलाकडून एस्कॉर्ट

पंतप्रधान नरेंद्र मोदी सोमवारी इंडोनेशियाची राजधानी जकार्ता येथे दाखल झाल्यानंतर विमानतळावर इंडोनेशियाचे राष्ट्राध्यक्ष प्रबावो सुबियांतो यांनी त्यांचे स्वागत केले. तसेच विमान उतरण्यापूर्वी इंडोनेशियन हवाई दलाच्या लढाऊ विमानांनी पंतप्रधान मोदींच्या विमानाला संरक्षण दिले. हा सन्मान एका विशेष शासकीय स्वागताचा भाग मानला जातो. विमानाला दिलेली ही सुरक्षा विशेष शासकीय सन्मान आणि स्वागताचे प्रतीक मानले जाते.

इंडोनेशियाचे सबांग बंदर भारतासाठी महत्त्वाचे

इंडोनेशियाचे सबांग बंदर अंदमान आणि निकोबार बेटांच्या अगदी जवळ वसलेले आहे. 2018 मध्ये पंतप्रधान मोदींच्या जकार्ता दौऱ्यादरम्यान, भारत आणि इंडोनेशियाने सबांग बंदर परिसरात सागरी सहकार्य वाढवण्यास सहमती दर्शवली होती. यामध्ये बंदराचा विकास, सागरी संपर्क, लॉजिस्टिक्स सहकार्य आणि सागरी सुरक्षा मजबूत करण्याचा समावेश होता.

बुधवारपासून ऑस्ट्रेलिया दौरा

इंडोनेशियानंतर पंतप्रधान मोदी 8 ते 10 जुलै दरम्यान ऑस्ट्रेलियातील मेलबर्न येथे भेट देणार आहेत. हा दौरा ऑस्ट्रेलियाचे पंतप्रधान अँथनी अल्बानीज यांच्या निमंत्रणावरून होत आहे. मेलबर्नमध्ये मोदी ऑस्ट्रेलियाचे पंतप्रधान अल्बानीज यांच्यासोबत द्विपक्षीय चर्चा करतील. ते ऑस्ट्रेलियाचे गव्हर्नर-जनरल सॅम मॉस्टिन यांचीही भेट घेतील. पंतप्रधान भारत-ऑस्ट्रेलिया सीईओ फोरममध्ये सहभागी होऊन दोन्ही देशांतील प्रमुख व्यावसायिक नेत्यांना संबोधित करतील. ते भारतीय समुदायाच्या एका प्रमुख कार्यक्रमालाही उपस्थित राहतील.

10-11 जुलैला न्यूझीलंड दौरा

ऑस्ट्रेलियानंतर पंतप्रधान मोदी 10 ते 11 जुलै दरम्यान न्यूझीलंडमधील ऑकलंड येथे अधिकृत दौरा करणार आहेत. जवळपास चार दशकांत न्यूझीलंडला भेट देणारे हे पहिले भारतीय पंतप्रधान असतील. ऑकलंडमध्ये पंतप्रधान मोदी, न्यूझीलंडचे पंतप्रधान क्रिस्टोफर लक्सन यांच्यासोबत द्विपक्षीय चर्चा करतील. गेल्या दोन वर्षांत व्यापार, वाणिज्य, संरक्षण आणि इतर क्षेत्रांमध्ये लक्षणीय प्रगती झालेल्या द्विपक्षीय सहकार्याचा दोन्ही नेते आढावा घेतील.