केरळमध्ये मंदिरातील दागिने चोरणारा पुजारी अटकेत

सोन्याची तीन नाणी चोरल्याचा आरोप

वृत्तसंस्था / तिरुअनंतपुरम

केरळच्या तिरुअनंतपुरम शहरातील मनाकौड येथे असलेल्या एका मंदिरातून सोन्याचे दागिने चोरल्याप्रकरणी पुजाऱ्याला अटक करण्यात आली आहे. पोलिसांनी रविवारी यासंबंधी माहिती दिली आहे. मुथुमारी अम्मन मंदिरात पुजारी म्हणून कार्यरत अरुणवर मंदिरातील तीनहून अधिक सोन्याची नाणी चोरल्याचा आरोप आहे.

चौकशीदरम्यान अरुणने सोने चोरल्याची कबुली दिली आहे. तसेच हे सोने तारण म्हणून ठेवत कर्जाची उचल केल्याचेही त्याने सांगितले आहे. अरुण विरोधात शनिवारी गुन्हा नोंदविण्यात आला होता तर रविवारी त्याला अटक करण्यात आली आहे. मंदिराचे सोने लवकरात लवकर हस्तगत करण्यासाठी पावले उचलण्यात येतील अशी माहिती पोलिसांनी दिली आहे. तर या घटनेनंतर स्थानिक लोकांकडून अरुण म्हणजेच पुजाऱ्याच्या विरोधात संताप व्यक्त करण्यात आला आहे.