ओरोस ग्रामपंचायतीचा स्तुत्य उपक्रम
सिंधुदुर्गनगरी / प्रतिनिधी : भारतीय स्वातंत्र्यदिनाचे औचित्य साधून ओरोस बुद्रुक ग्रामपंचायतीच्या वतीने एक अत्यंत स्तुत्य आणि कौतुकास्पद उपक्रम राबवण्यात आला. ग्रामपंचायतीचे प्रभारी सरपंच पांडुरंग उर्फ अमोल मालवणकर यांनी सामाजिक भान जपत गावातील निष्ठावंत अंगणवाडी सेविका श्रीम. श्रद्धा तावडे यांना राष्ट्रीय ध्वज फडकविण्याचा बहुमान दिला.
स्वातंत्र्यदिनाच्या या पवित्र सोहळ्यात अंगणवाडी सेविका श्रीम. श्रद्धा तावडे यांच्या हस्ते मुख्य ध्वजारोहण अत्यंत उत्साहात आणि भक्तिभावात पार पडले. तळागाळात राहून बालकांचे संगोपन आणि आरोग्य सेवा देणाऱ्या अंगणवाडी सेविकेला असा सर्वोच्च सन्मान दिल्याबद्दल सर्वच स्तरांतून ओरोस ग्रामपंचायतीचे आणि प्रभारी सरपंचांचे कौतुक होत आहे.
ध्वजारोहण सोहळ्यानंतर स्थानिक शाळांमधील विद्यार्थ्यांनी विविध देशभक्तीपर गीते, राष्ट्रगीत आणि सांस्कृतिक कार्यक्रम सादर केले. लहान मुलांनी हातात तिरंगा घेऊन "भारत माता की जय" च्या घोषणांनी परिसर दुमदुमून टाकला. विद्यार्थ्यांनी सादर केलेल्या राष्ट्रभक्तीपर गीतांनी उपस्थितांची मने जिंकून घेतली.
या प्रसंगी प्रभारी सरपंच पांडुरंग उर्फ अमोल मालवणकर यांनी उपस्थितांना संबोधित करताना स्वातंत्र्यदिनाच्या शुभेच्छा दिल्या आणि गावाच्या विकासासाठी कटिबद्ध असण्याचा पुनरुच्चार केला. या सोहळ्याला ग्रामपंचायतीचे सदस्य, ग्रामविकास अधिकारी, स्थानिक मान्यवर, महिला बचत गटाच्या प्रतिनिधी, शिक्षक, अंगणवाडी मदतनीस, ग्रामस्थ आणि शालेय विद्यार्थी मोठ्या संख्येने उपस्थित होते.
"सामान्य घटकांना आणि महिलांना सन्मान देणारा ओरोस ग्रामपंचायतीचा हा निर्णय खरोखरच कौतुकास्पद आणि इतरांसाठी प्रेरणादायी आहे."