ब्लिट्झमध्ये प्रज्ञानंदची घसरण, अलीरेझाची आघाडी

वृत्तसंस्था/ झाग्रेब (क्रोएशिया),

ग्रँडमास्टर आर प्रज्ञानंदला आपल्या रॅपिड प्रकारातील कामगिरीची पुनरावृत्ती करता आली नाही आणि त्याला ब्लिट्झ विभागाच्या पहिल्या नऊ फेऱ्यांमधून केवळ 3.5 गुण मिळवता आले, तर दुसरीकडे फ्रान्सच्या अलीरेझा फिरौजाने शानदार प्रदर्शन करत ग्रँड बुद्धीबळ टूरच्या क्रोएशियन टप्प्याच्या उपांत्य दिवसानंतर एकमेव आघाडी घेतली.

अलीरेझाने वेगवान प्रकारात अप्रतिम कामगिरी केली. त्याने शक्य असलेल्या नऊपैकी तब्बल आठ गुण मिळवले आणि उझबेकिस्तानचा नोदिरबेक अब्दुसत्तोरोव्ह व फ्रान्सचा मॅक्सिम वॉशियर-लाग्रेव्ह या आपल्या जवळच्या प्रतिस्पर्धकांवर 20 गुणांसह तीन गुणांची मोठी आघाडी घेतली. प्रज्ञानंद 15.5 गुणांसह चौथ्या स्थानावर घसरला, तर विश्वविजेत्या डी. गुकेशने पुन्हा एकदा सामान्य कामगिरी करत 14 गुणांसह पाचवे स्थान पटकावले.

ग्रँड चेस टूरमधील सर्वात प्रभावी कामगिरींपैकी एक म्हणता येईल अशा कामगिरीत, फिरौझाने अर्ध्या स्पर्धकांना किमान सात गुणांनी मागे टाकले आहे. जर्मनीचा व्हिन्सेंट केमर 13 गुणांसह सहाव्या स्थानावर आहे, डच खेळाडू अनिश गिरी आणखी अर्ध्या गुणाने मागे आहे, तर रोमानियाचा डेक बोगदान-डॅनियल 11.5 गुणांवर आहे. आणखी दोन गुणांनी मागे हॉलंडचा जॉर्डन व्हॅन फोरिस्ट आहे आणि क्रोएशियाचा इव्हान सारिक केवळ 5 गुणांसह तळाशी आहे.

रॅपिड सेक्शननंतर अलीरेझासोबत संयुक्तपणे आघाडीवर असलेल्या प्रज्ञानंदाने नाट्यामय पुनरागमन केले, पण ब्लिट्झ सेक्शनमध्ये त्याचा खेळ बिघडला. दिवसाची सुरुवात केमरवर विजय मिळवून केल्यानंतर, प्रज्ञानंदने गिरीसोबतचा पुढचा सामना बरोबरीत सोडवला, पण त्यानंतरच्या सलग चार पराभवांमुळे त्याचा आत्मविश्वास खचला. स्पर्धेच्या चौथ्या दिवशी, या भारतीय खेळाडूने शक्य असलेल्या आठ गुणांपैकी केवळ 3.5 गुणांची कमाई करता आली. प्रज्ञानंदपेक्षा अर्धा गुण अधिक मिळवूनही गुकेशची परिस्थिती फारशी वेगळी नव्हती. आतापर्यंतच्या सर्वात तरुण विश्वविजेत्याला सलग चार पराभव पत्करावे लागल्याने त्याच्या कामगिरीला फारसा फायदा झाला नाही. ब्लिट्झ सेक्शनमध्ये अजून 9 फेऱ्या बाकी असल्याने, अव्वल स्थान कदाचित आधीच निश्चित झाले आहे. 2,00,000 अमेरिकन डॉलर्स बक्षीस रकमेच्या या स्पर्धेच्या अंतिम दिवशी जर प्रज्ञानंदाने आपला फॉर्म परत मिळवला, तर त्याला पोडियमवर स्थान मिळवण्याची अजूनही संधी आहे.

राउंड 9 रॅपिड आणि ब्लिट्झच्या 9 फेऱ्यांनंतरची स्थिती: 1. फिरौजा अलीरेझा (फ्रान्स) 20 गुण; 2-3. मॅक्सिम वॅचियर-लग्राव्ह (फ्रान्स) नोदिरबेक अब्दुसत्तोरोव (उझब) प्रत्येकी 17 गुण; 4. आर प्रज्ञानंद (इंडिया) 15.5 गुण; 5. डी गुकेश (इंडिया) 13.5 गुण; व्हिन्सेंट कीमर (जर्मन) 13 गुण; 7. अनिश गिरी (नेड) 12.5 गुण; 8. डीक बोगदान-डॅनियल 11.5 गुण, जॉर्डन व्हॅन फॉरेस्ट (नेड) 9.5 गुण; 10. इव्हान सारिक (क्रो) 5 गुण.