Pooja Bhatt on Bobby Deol "त्याच्यासोबतचा काळ खूप"... बॉबी देओलसोबतच्या प्रेमप्रकरणावर पूजा भट्ट स्पष्टच बोलली

नातं का संपलं?

आपल्या नात्याबद्दल बोलताना पूजा स्पष्टपणे म्हणाली की, "आज इथे बसून आपलं नातं का संपलं? किंवा ते कसं होतं याबद्दल बोलणं मला योग्य वाटत नाही... ते जसं होतं तसंच होतं. आम्ही ते कधीच लपवलं नाही. आज तो विवाहित आहे, मोठ्या मुलांचा बाप आहे आणि त्याच्या करिअरच्या एका नव्या शानदार टप्प्यावर आहे. 'ॲनिमल'मधलं त्याचं काम मला खूप आवडलं. माझ्या मते , त्याने त्या चित्रपटात जिवंतपणा आणला. मला त्याच्यासाठी खूप आनंद होत आहे."

एखाद्या व्यक्तीसोबतचा वेळ

पूजा पुढे म्हणाली की, तिला तिच्या जुन्या नात्याला कमी लेखायचे नाही किंवा त्याचे महत्त्व कमी करायचे नाही, त्यामुळे ते नाते का टिकले नाही हे स्पष्ट करण्याची गरज नाही.

 "एखाद्या व्यक्तीसोबत घालवलेला वेळ खूप महत्त्वाचा असतो... प्रत्येक गोष्टीला 'ते का जमलं नाही' असं वळण देण्याची गरज नाही. जोपर्यंत ते टिकलं, तोपर्यंत ते चांगलं होतं. बस्स. स्वतःचा आणि आपल्यासोबत असलेल्या लोकांचा मान आणि आदर जपणं महत्त्वाचं आहे."