‘या’ कारणास्तव पीएफ खाते हस्तांतरित होत नाही

कर्मचाऱ्यांसह निवृत्ती वेतनधारकांशी संबंधीत तक्रारी : समस्यांचे निराकरण करण्यासाठीची पाच कारणे

वृत्तसंस्था, नवी दिल्ली

कर्मचारी भविष्य निर्वाह निधी संघटना (ईपीएफओ) आपल्या सदस्यांना विविध सुविधा पुरवते. पीएफ खाते हस्तांतरणापासून ते पैसे काढण्यापर्यंतच्या प्रक्रिया सुलभ करण्यासाठी अनेक नियम बनवण्यात आले आहेत. तरीही, अनेक लोक अजूनही त्यांचे पीएफ खाते हस्तांतरित करता येत नसल्याबद्दल तक्रार करताना दिसतात.

सोशल मीडियावर अशा अनेक तक्रारी पाहायला मिळतात, जिथे कर्मचारी किंवा निवृत्तीवेतनधारक पैसे काढण्याशी संबंधित समस्यांसाठी इपीएफओला जबाबदार धरतात. पण, तुम्हाला माहित आहे का की तुमच्याकडून होणाऱ्या काही चुका किंवा दुर्लक्षामुळेही तुमचे पीएफ खाते हस्तांतरित होऊ शकत नाही?

सदस्यांना त्यांचे पीएफ खाते हस्तांतरित करता न येण्याची 5 कारणे पाहुया

चुकीची माहिती देणे

अनेकदा, कर्मचारी किंवा निवृत्तीवेतनधारकाकडून होणाऱ्या एका लहानशा चुकीमुळेही पीएफ खाते हस्तांतरित होऊ शकत नाही. जर तुम्ही तुमचा सदस्य आयडी, सेवेचा तपशील किंवा बँक खात्याबद्दल चुकीची माहिती दिली, तर हस्तांतरणाची प्रक्रिया पूर्ण होणार नाही. जर तुमच्याकडून अशा चुका झाल्या असतील, तर त्या आधी दुरुस्त करणे आवश्यक आहे.

एकापेक्षा जास्त युएनए असणे

अनेकदा असे घडते की जेव्हा एखादा कर्मचारी नवीन कंपनीत रुजू होतो, तेव्हा नवीन युएनए (युनिव्हर्सल अकाउंट नंबर) तयार केला जातो. जर कर्मचाऱ्याने नवीन नियोक्त्याला आपल्या जुन्या पीएफ खात्याचा तपशील दिला नाही, तर पीएफचे पैसे काढताना अडचणी येण्याची शक्यता नाकारता येत नाही. हे सोडवण्यासाठी,  आधी तुमची सर्व पीएफ खाती विलीन करावी लागतील, त्यानंतरच हस्तांतरणाची प्रक्रिया पूर्ण होईल.

माहितीमधील तफावत

कधीकधी, जुन्या पीएफ खात्यातील तपशील नवीन खात्यातील तपशीलांशी जुळत नाहीत, ज्यामुळे शिल्लक रक्कम हस्तांतरित करण्यात किंवा पैसे काढण्यात समस्या येतात. पीएफ खाती हस्तांतरित करताना किंवा विलीन करताना, तुमचे नाव, वडिलांचे किंवा पतीचे नाव आणि इतर तपशील योग्यरित्या नोंदवलेले असल्याची खात्री आवश्य करायला हवी.

अपूर्ण केवायसी प्रक्रिया

जर तुमचे आधार किंवा पॅन (केवायसी) तुमच्या बँक खात्याशी जोडलेले नसेल, किंवा पीएफ खात्याची केवायसी प्रक्रिया प्रलंबित असेल किंवा नाकारली गेली असेल, तर तुम्ही तुमच्या पीएफ खात्यातून पैसे काढू शकणार नाही. ही समस्या सोडवण्यासाठी तुम्हाला आधी केवायसी प्रक्रिया पूर्ण करावी लागेल.

नोकरी सोडल्याची तारीख अपडेट न करणे

जेव्हा तुम्ही एखादी कंपनी सोडून नवीन कंपनीत रुजू होता, तेव्हा तुमच्या पीएफ खात्यात मागील नोकरी सोडल्याची तारीख (डेट ऑफ एक्झिट) अपडेट करणे आवश्यक असते. जर तुमच्या जुन्या नियोक्त्याने असे केले नाही, तर तुमच्या पीएफ खात्यातील शिल्लक रक्कम हस्तांतरित होऊ शकत नाही.