पेटीएम समभागाची वाटचाल तेजीकडे

एका दिवसात 5 टक्क्यांची वाढ : व्यापाऱ्यांची सेवा सुरु राहणार

मुंबई :

पेटीएम कंपनीच्या समभागांनी मंगळवारच्या ट्रेडिंग सत्रात 5 टक्क्यांच्या वरच्या सर्किटवर पोहचून 376.45 रुपयांची पातळी गाठली आहे. आकडेवारीनुसार, गेल्या तीन ट्रेडिंग सत्रांपासून पेटीएमच्या समभागामध्ये सतत वाढ होत आहे. या कालावधीत सुमारे 16 टक्के वाढ दिसून आली आहे.

या वाढीचे कारण पेटीएमने अॅक्सिस बँकेसोबत केलेल्या कराराची बातमी सांगितली जात आहे. याआधी आरबीआयने उचललेल्या कठोर पावलांमुळे पेटीएम कंपनीच्या समभागाच्या भावात घसरण झाली होती. पेटीएमचे समभाग सकाळी 11 वाजता 376.25 रुपयांच्या पातळीवर व्यवहार करत होते.

पेटीएमला गेल्या व्यावसायिक आठवड्यात आरबीआयकडून थोडा दिलासा मिळाल्याचे दिसत आहे. खरं तर, आरबीआयने पेटीएम पेमेंट बँक आणि इतर आवश्यक बँकिंग आणि वॉलेट ऑपरेशन्सवरील बंदी 15 दिवसांसाठी वाढवली आहे.

ईडीकडूनही दिलासा

दुसरीकडे, पेटीएमसाठी ईडीकडून आणखी एक सकारात्मक बातमी आली आहे. वास्तविक, ईडीने पेटीएम पेमेंट्स बँक लिमिटेडच्या सर्व व्यवहारांची तपासणी केली ज्यामध्ये त्यांना एफइएमए नियमांचे कोणतेही उल्लंघन आढळले नाही. यामुळे काहीसा दिलासा पेटीएमला मिळण्याचे संकेत आहेत.

आरबीआयने म्हटले आहे की.......

जर कोणी व्यापारी पेटीएम क्यूआर कोड, पेटीएम साउंड बॉक्स, पेटीएम पीओएस टर्मिनल वापरत असेल तर लिंक केलेल्या खात्यातून कोणत्याही प्रकारचे पेमेंट घ्या. त्यामुळे त्या व्यापाऱ्याची सेवा बंद होणार नाही.