फ्लिपकार्ट आणि नेटफ्लिक्स यांच्यामध्ये भागीदारी

वृत्तसंस्था, नवी दिल्ली

देशातील आघाडीची ई-कॉमर्स कंपनी फ्लिपकार्ट आणि ओटीटी प्लॅटफॉर्म नेटफ्लिक्स यांनी एक नवीन भागीदारी केली आहे. याअंतर्गत, फ्लिपकार्ट प्लस सदस्य आता 1 ऑगस्टपासून नियमित खरेदीद्वारे नेटफ्लिक्स मोबाईल प्लॅनचा लाभ घेऊ शकणार आहेत. नेटफ्लिक्सची एखाद्या भारतीय ई-कॉमर्स कंपनीसोबतची ही पहिलीच भागीदारी राहणार आहे.

या योजनेअंतर्गत, जे फ्लिपकार्ट प्लस सदस्य एका कॅलेंडर महिन्यात 299 रुपये किंवा त्याहून अधिक किमतीच्या 4 ऑर्डर देतील, त्यांना 30 दिवसांसाठी नेटफ्लिक्स मोबाईल प्लॅन मिळेल. या ऑर्डर फ्लिपकार्ट, फ्लिपकार्ट मिनिट्स किंवा फ्लिपकार्ट ग्रोसरीवर देता येणार आहेत.

चौथी ऑर्डर पूर्ण झाल्यावर, नेटफ्लिक्स प्लॅन फ्लिपकार्ट अॅपद्वारे सक्रिय होईल. यासाठी कोणतेही वेगळे पेमेंट किंवा वेगळे लॉगिन आवश्यक नाही. मात्र, ही सुविधा सुरू ठेवण्यासाठी ग्राहकांना दर महिन्याला पुन्हा 4 ऑर्डर्स पूर्ण कराव्या लागतील. जे ग्राहक आधीपासून फ्लिपकार्ट प्लस सदस्य नाहीत, ते देखील 12 महिन्यांत 15 ऑर्डर्स पूर्ण केल्यानंतर कोणत्याही अतिरिक्त शुल्काशिवाय सदस्य बनतील. कंपनीचे म्हणणे आहे की, फ्लिपकार्ट प्लस सदस्य सामान्य ग्राहकांपेक्षा सुमारे चारपट जास्त खरेदी करतात.

ही भागीदारी अशा वेळी झाली आहे, जेव्हा भारताची ई-कॉमर्स बाजारपेठ वेगाने वाढत आहे. बॉस्टन कन्सल्टिंग ग्रुपच्या (बीसीजी) मते, देशाची ई-कॉमर्स बाजारपेठ सध्याच्या 120-140 अब्ज डॉलर्सवरून 2030 पर्यंत 280-300 अब्ज डॉलर्सपर्यंत पोहोचू शकते. त्याच वेळी, ऑनलाइन खरेदीदारांची संख्या 2025 मधील 30 कोटींवरून 2030 पर्यंत 44 कोटींपर्यंत वाढण्याची अपेक्षा आहे. या वाढीमध्ये ग्रामीण भाग, महिला आणि तरुण महत्त्वाची भूमिका बजावण्याची शक्यता आहे.

फ्लिपकार्टचे मुख्य वित्तीय अधिकारी आणि वरिष्ठ उपाध्यक्ष (धोरणात्मक भागीदारी) रवी अय्यर म्हणाले की, आज देशातील एकूण खरेदीमध्ये ‘जनरेशन जी‘चा वाटा सुमारे 45 ते 50 टक्के आहे. ही श्रेणी मनोरंजन आणि डिजिटल सामग्रीला अधिक महत्त्व देते. त्यामुळे, ही भागीदारी ग्राहकांच्या बदलत्या पसंतीनुसार जुळवून घेते.