सत्तरीतील प्रेमाला रक्तरंजीत वळण; पंढरपुरात 70 वर्षीय प्रियकराची हत्या

पंढरपूर : पंढरपूर तालुक्यात दोन वृद्धांमधील प्रेमसंबंधाला रक्तरंजीत वळण लागल्याची धक्कादायक घटना समोर आली आहे. 70 वर्षीय वृद्धाची हत्या करून मृतदेह अर्धवट जाळण्याचा प्रयत्न केल्याचा प्रकार उघडकीस आला असून, या प्रकरणी एका वृद्ध महिलेला पोलिसांनी अटक केली आहे.

अंबादास खांडेकर असे मृत व्यक्तीचे नाव असून मंगल होनमाने असे अटक करण्यात आलेल्या महिलेचे नाव आहे. मिळालेल्या माहितीनुसार, अंबादास खांडेकर आणि मंगल होनमाने यांच्यात गेल्या काही वर्षांपासून प्रेमसंबंध असल्याची माहिती आहे. मात्र, काही कारणावरून दोघांमध्ये वाद निर्माण झाला आणि त्यातून ही घटना घडल्याचा पोलिसांचा प्राथमिक तपास आहे.

सुमारे 27 जुलै रोजी पंढरपूर तालुक्यातील एका शेतात अंबादास खांडेकर यांच्यावर हल्ला करण्यात आल्याची माहिती आहे. या हल्ल्यात त्यांचा मृत्यू झाला. त्यानंतर मृतदेह अर्धवट जाळण्याचा प्रयत्न करण्यात आल्याचे तपासात समोर आले.

घटनेची माहिती मिळाल्यानंतर पोलिसांनी तपास सुरू केला. तपासादरम्यान संशयित महिलेचा सहभाग समोर आल्यानंतर मंगल होनमाने यांना अटक करण्यात आली. हत्येचे नेमके कारण, घटनेमागील पार्श्वभूमी तसेच या प्रकरणातील इतर बाबींचा तपास पोलीस करत आहेत.

सत्तरीच्या वयात असलेल्या दोघांच्या प्रेमसंबंधातून हत्या झाल्याच्या या घटनेने पंढरपूर तालुक्यात खळबळ उडाली आहे. प्रकरणाचा पुढील तपास पोलिसांकडून सुरू आहे.