बागेपल्लीत पाकिस्तानी महिलेसह मुलाला अटक

स्थानिक पोलिसांची कारवाई : रेशनकार्ड, मतदार ओळखपत्र रद्द

त. भा. प्रतिनिधी

बेंगळूर

चिक्कबळ्ळापूर जिल्ह्यातील बागेपल्ली येथे एका पाकिस्तानी महिलेसह तिच्या मुलाला अटक करण्यात आली आहे. या महिलेचे लग्न एका भारतीय व्यक्तीशी झाले असून त्यांना तीन भारतीय मुले आहेत. सध्या, पोलिसांनी आई आणि मुलाचे रेशनकार्ड आणि मतदार ओळखपत्र रद्द केले आहे. फराह नाझ आणि तिचा मुलगा मोहम्मद फरदीन अशी त्यांची नावे आहेत.

चिक्कबळ्ळापूर जिल्ह्यातून नागरिकत्वाचे एक गुंतागुंतीचे प्रकरण समोर आले आहे. एका दाम्पत्याला चार मुले असून त्यापैकी एक पाकिस्तानी तर इतर तीन भारतीय आहेत. इतकेच नाही, तर ती महिला सुऊवातीपासूनच पाकिस्तानी नागरिक असून भारतात बेकायदेशीरपणे राहत आहे. स्थानिक पोलिसांच्या माहितीनुसार, त्या महिलेने आणि तिच्या पाकिस्तानी मुलाने बेकायदेशीरपणे रेशनकार्ड, आधारकार्ड आणि मतदार ओळखपत्रे मिळवली होती. या दाम्पत्याविऊद्ध गुन्हा दाखल करण्यात आला असून त्या महिलेला आणि तिच्या मुलाला अटक करण्यात आली आहे.

सदर पाकिस्तानी महिला भारतात बेकायदेशीरपणे राहत होती. इतकेच नाही तर तिचा एक मुलगा जो पाकिस्तानी नागरिक आहे, तोही येथे बेकायदेशीरपणे राहत आहे. त्या दोघांनी रेशनकार्ड आणि मतदार ओळखपत्र यासारखी कागदपत्रे मिळवली आहेत, अशी माहिती विश्वसनीय सूत्रांकडून स्थानिक पोलिसांना मिळाली होती. त्यानुसार दोघांवर अटकेची कारवाई करण्यात आली आहे.

याबाबत बोलताना चिक्कबळ्ळापूरचे पोलीस अधिकारी कुशल चौकसे म्हणाले, सूत्रांकडून माहिती मिळाल्यानंतर आम्ही कारवाई करत पाकिस्तानी नागरिक फराह नाझ आणि तिचा मुलगा मोहम्मद फरदीन यांना अटक केली आहे. तसेच त्यांचे रेशनकार्ड व मतदार ओळखपत्रही जप्त करण्यात आले आहे. याचबरोबर  दोघांवर बीएनएस आणि परदेशी कायद्याशी संबंधित कलमांखाली गुन्हा दाखल करण्यात आला आहे, असे त्यांनी सांगितले.

संयुक्त अरब अमिरातीमध्ये झाली होती भेट

पोलिसांच्या म्हणण्यानुसार, या संपूर्ण प्रकरणाची सुऊवात संयुक्त अरब अमिरातीमध्ये झाली. बागेपल्लीचा रहिवासी असलेला मोहम्मद आयुब खान तिथे काम करत होता. दरम्यान, त्याची भेट फराह नाझ नावाच्या एका पाकिस्तानी महिलेशी झाली. त्यांनी लग्न केले. जेव्हा ते त्यांच्या पहिल्या मुलाच्या गर्भारपणात होते, तेव्हा फराह नाझ पाकिस्तानला निघून गेली. त्याचा जन्म तिथे झाल्यामुळे तो पाकिस्तानी नागरिक झाला. त्यानंतर फराह सौदी अरेबियामार्गे भारतात आली. त्यानंतर या जोडप्याला आणखी तीन मुले झाली. त्या सर्वांचा जन्म भारतात झाल्यामुळे ते भारतीय नागरिक झाले. या घटनेनंतर, चिकबळ्ळापूरच्या तहसीलदारांनी त्यांची मतदार ओळखपत्रे आणि रेशनकार्ड रद्द केली. दोघांना अटक करण्यात आली असून प्रकरणाचा तपास सुरू आहे.