पाकने निवड समितीच बदलली, पंचांना बनवले निवडकर्ता

लाजिरवाण्या पराभवानंतर घेतला निर्णय

वृत्तसंस्था/ इस्लामाबाद

इंग्लंडविरुद्ध पाकिस्तानचा एक डाव आणि 47 धावांनी पराभव झाल्यानंतर काही तासांनी पाकिस्तान क्रिकेट बोर्डाने नवीन निवड समितीची घोषणा केली आहे. त्यात माजी कसोटीपटू आकिब जावेद, अझहर अली, कसोटी पंच अलीम दार आणि विश्लेषक हसन चीमा यांचा समावेश आहे. पाकिस्तान क्रिकेट बोर्डाने घाईघाईत मोठे बदल केले आहेत. आता याचा संघावर किती परिणाम होतो हे भविष्यातच कळेल.

मोहम्मद युसूफ यांनी पॅनेलचा राजीनामा दिल्यानंतर अवघ्या 10 दिवसांनी ही घटना घडली आहे. हा बदल अशा वेळी आला आहे जेव्हा पाकची सर्व फॉरमॅटमध्ये खराब कामगिरी झाली आहे. या तिघांमध्ये माजी खेळाडू असद शफीक आणि संघ विश्लेषक हसन चीमा यांचा समावेश आहे, ज्यांना आता निवड समितीमध्ये मतदानाचा हक्क आहे. पाकिस्तानचे मुख्य प्रशिक्षक गॅरी कर्स्टन (पांढरा चेंडू) आणि जेसन गिलेस्पी (लाल चेंडू) निवड समितीवर मतदान सदस्य म्हणून राहतील की नवीन पॅनेलचे मुख्य निवडकर्ता कोण असतील हे पीसीबीने स्पष्ट केले नाही.

अलीम दार यांनी नुकतेच जाहीर केले होते की ते चालू हंगामात शेवटच्या वेळी अंपायरिंग करणार आहे. पाकिस्तानच्या निवड समितीमध्ये नामवंत पंचाचा समावेश होण्याची ही पहिलीच वेळ आहे. नवीन निवड समितीचे पहिले काम इंग्लंडविरुद्धच्या उर्वरित दोन कसोटी सामन्यांसाठी पाकिस्तान संघाची निवड करणे हे असेल. 15 ऑक्टोबरपासून दुसरी कसोटी सुरू होईल.