ओरिफ्लेम भारतातील उत्पादन व्यवसाय विकणार

प्युअर अॅण्ड क्युअरसोबत करार

वृत्तसंस्था, नवी दिल्ली

स्वीडिश सौंदर्य आणि आरोग्यसेवा ब्रँड ओरिफ्लेमने भारतातील आपला उत्पादन व्यवसाय प्युअर अँड क्युअर हेल्थकेअर प्रायव्हेट लिमिटेडकडे हस्तांतरित करण्यास सहमती दर्शवली आहे. ओरिफ्लेमने ही घोषणा केली. प्युअर अँड क्युअर हेल्थकेअर ही अक्युम्स ड्रग्स अँड फार्मास्युटिकल्स लिमिटेडची पूर्ण मालकीची उपकंपनी आहे. ही भारतातील आघाडीच्या कॉन्ट्रॅक्ट ड्रग डेव्हलपमेंट अँड मॅन्युफॅक्चरिंग कंपन्यांपैकी एक आहे.

या करार व्यवहाराची रक्कम जाहीर करण्यात आलेली नाही. प्रस्तावित करारामध्ये ओरिफ्लेम इंडियाच्या उत्तराखंडमधील रुरकी आणि उत्तर प्रदेशातील नोएडा येथील उत्पादन युनिट्सचा समावेश आहे. हा व्यवहार पूर्ण होणे हे सर्वसाधारण अटी आणि नियामक मंजुरींच्या अधीन आहे. या करारानुसार, ओरिफ्लेम आणि अक्युम्स एक दीर्घकालीन धोरणात्मक उत्पादन आणि पुरवठा भागीदारी करतील. अक्युम्स ओरिफ्लेम उत्पादनांचे उत्पादन सुरू ठेवेल. यामुळे पुरवठ्यात सातत्य राहील आणि ओरिफ्लेम ब्युटीचे उद्योजक व ग्राहकांना अपेक्षित असलेले उच्च दर्जाचे मानक कायम राखले जातील.

भारत ही महत्त्वाची बाजारपेठ

ओरिफ्लेमने आपल्या प्रसिद्धीपत्रकात म्हटले आहे, ‘भारत ओरिफ्लेमसाठी एक धोरणात्मकदृष्ट्या महत्त्वाची बाजारपेठ बनली आहे. कंपनी देशात 30 वर्षांहून अधिक काळ कार्यरत आहे आणि देशभरातील सौंदर्य उद्योजकांच्या नेटवर्कद्वारे ग्राहकांना सेवा देत, आपला वेगाने वाढणारा सोशल सेलिंग व्यवसाय सुरू ठेवेल. हा करार ओरिफ्लेमच्या जागतिक स्तरावरील कार्यान्वयन आणि सोर्सिंग क्षमता सुधारण्याच्या प्रयत्नांचा एक भाग आहे.’

काय म्हणाल्या सीईओ

ओरिफ्लेमच्या मुख्य कार्यकारी अधिकारी आणि अध्यक्षा, अॅना मेलमहके म्हणाल्या, ‘भारत ओरिफ्लेमसाठी एक महत्त्वाची बाजारपेठ आहे. आम्ही देशातील विकासाच्या आमच्या दीर्घकालीन महत्त्वाकांक्षेसाठी पूर्णपणे वचनबद्ध आहोत. अक्युम्ससोबतच्या या धोरणात्मक भागीदारीद्वारे, आम्ही उच्च-गुणवत्तेच्या उत्पादन क्षमतांची उपलब्धता सुनिश्चित करत आहोत, तसेच कार्यान्वयन क्षमता वाढवत आहोत.’