Operation Tiger लोकसभा अध्यक्षांना स्वतंत्र गटाचं पत्र नाही, शिवसेनेच्या दुसऱ्या फुटीत बंडखोरांची संख्या अस्पष्ट...

बैठकीला हजर राहण्याचे आदेश

शिवसेना (यूबीटी) प्रमुख उद्धव ठाकरे यांच्यासोबत लोकसभेचे किती सदस्य आहेत आणि ते फूट टाळू शकतील की नाही, हे ठरवण्यासाठी ही बैठक होती. शिवसेना (यूबीटी) लोकसभा नेते अरविंद सावंत यांनी बुधवारी व्हीप जारी करून सर्व नऊ सदस्यांना दुसऱ्या दिवशी सकाळी ११ वाजता नवी दिल्लीत होणाऱ्या बैठकीला उपस्थित राहण्याचे निर्देश दिले.

पक्षाच्या खासदारांनी बैठकीला गैरहजर राहिल्यास कारवाईचा इशाराही त्यांनी दिला. “शिवसेनाप्रमुख बाळासाहेब ठाकरे यांनी निर्देश दिले होते की, जर कोणताही खासदार पक्षांतर करेल, तर त्याला रस्त्यावर तुडवले पाहिजे,” असा थेट इशारा त्यांनी बंडखोरांना दिला.

सर्व खासदारांना निमंत्रणे

शिवसेना (यूबीटी) चे लोकसभा सदस्य अनिल देसाई म्हणाले की, पक्षाच्या सर्व खासदारांना व्हॉट्सॲप, ईमेल आणि इतर माध्यमांद्वारे निमंत्रणे पाठवण्यात आली आहेत. “निमंत्रण मिळाल्याची पोचपावतीही आमच्याकडे आहे आणि आम्हाला आशा आहे की आमचे सर्व खासदार बैठकीला उपस्थित राहतील,” असे देसाई बैठकीपूर्वी म्हणाले.

शिवसेना नेते संजय शिरसाट म्हणाले की, शिवसेनेच्या (यूबीटी) सहा खासदारांच्या भूमिकेवर एका तासात स्पष्टता येईल. शिवसेनेच्या प्रवक्त्या शीतल म्हात्रे म्हणाल्या की, खासदारांशी बोलण्याऐवजी शिवसेना (यूबीटी) नेते संजय राऊत यांनी त्यांना शिवीगाळ करण्यास सुरुवात केली. “त्यांनी सहा खासदारांवर अविश्वास दाखवला आहे आणि त्यांना धमक्या देत आहेत. ते खासदारांना मारहाण करण्याची भाषा करत आहेत. संजय राऊत हे सर्व करून शिवसेनेला (यूबीटी) बदनाम करण्याचा प्रयत्न करत आहेत का? शिवसेनेने (यूबीटी) खासदारांशी संवाद साधायला हवा होता.”

एकनाथ शिंदे काय म्हणतात

बुधवारी, महाराष्ट्राचे उपमुख्यमंत्री एकनाथ शिंदे यांच्या नेतृत्वाखालील शिवसेनेने सांगितले की, शिवसेनेचे सहा बंडखोर खासदार संजय जाधव, भाऊसाहेब वाकचौरे, संजय देशमुख, नागेश पाटील आष्टीकर, संजय पाटील आणि ओमराजे निंबाळकर यांनी स्वतंत्र गट स्थापन केल्याच्या पत्रावर स्वाक्षरी केली आहे. “त्यांनी लोकसभा अध्यक्षांना पत्र सादर केल्याचे आम्हाला सांगण्यात आले आहे,” असे शिवसेना सचिव किरण पावस्कर म्हणाले.

बाळासाहेबांच्या तत्वांपासून पक्ष दूर गेल्याच आरोप

शिवसेनेच्या आणखी एका नेत्याने सांगितले की, पक्षाचे खासदार श्रीकांत शिंदे आणि महाराष्ट्राचे मंत्री प्रताप सरनाईक यांनी बुधवारी शिवसेना (यूबीटी) खासदारांसोबत अध्यक्षांची भेट घेतली. “खासदारांनी बिर्ला यांना चार पानी पत्र सादर केले आहे, ज्यात त्यांनी उद्धव ठाकरे यांच्या नेतृत्वाखालील पक्षावर आपला विश्वास नसल्याचे म्हटले आहे. तसेच, हा पक्ष शिवसेना संस्थापक बाळासाहेब ठाकरे यांच्या तत्त्वांपासून दूर गेला आहे, असेही त्यात नमूद केले आहे.”

हिंदूस्थान टाईम्सच्या वृत्तानुसार लोकसभेच्या एका अधिकाऱ्याने बुधवारी सांगितल्याप्रमाणे अध्यक्षांना शिवसेना किंवा इतर कोणत्याही पक्षाकडून कोणतेही पत्र मिळाल्याची पुष्टी झालेली नाही.

संजय दिना पाटलांचा यू टर्न

संजय पाटील यांनी बुधवारी आपण बंडखोर गटाचा भाग नसल्याचे स्पष्ट केले, त्यामुळे बंडखोरांच्या एकूण संख्येबद्दल शंका निर्माण झाली आहे. “मी कोणत्याही दुसऱ्या पक्षात सामील होत नाही हे मी स्पष्ट केले आहे. मी आज [बुधवारी] मुंबईतच आहे आणि गुरुवारी नवी दिल्लीत होणाऱ्या पक्षाच्या बैठकीलाही उपस्थित राहणार आहे,” असे ते म्हणाले. “मला कोणताही प्रस्ताव आलेला नाही किंवा कोणत्याही पक्षाने किंवा राजकीय नेत्याने माझ्याशी संपर्क साधलेला नाही.”

पक्षांतराच्या चर्चा सुरू असतानाच पाटील यांच्या मुंबईतील निवासस्थानाला पोलीस संरक्षण देण्यात आले होते, त्याचवेळी हे वक्तव्य आले आहे. त्यांची मुलगी आणि शिवसेना (यूबीटी) नगरसेविका राजूल पाटील यांनी सांगितले की, त्यांचे वडील मुंबईत असून ते शिवसेना (यूबीटी) सभेला उपस्थित राहणार आहेत. “अध्यक्षांना दिलेल्या पत्रावर त्यांनी सही केली आहे की नाही, हे मला माहीत नाही.”

बुधवारी संध्याकाळी मुंबईला परतण्यापूर्वी, शिंदे यांनी दिल्लीत १८ तास तळ ठोकला आणि शिवसेनेतील (यूबीटी) संभाव्य फुटीच्या विविध पैलूंवर कायदेतज्ज्ञांशी सल्लामसलत केली.

सावंत आणि देसाई यांच्यासमवेत राष्ट्रीय राजधानीत बिरला यांना भेटलेल्या संजय राऊत यांनी बुधवारी कोणत्याही संभाव्य पक्षांतराविरुद्ध इशारा दिला. पक्ष सोडू इच्छिणाऱ्यांनी राजीनामा देऊन पुन्हा जनतेला सामोरे जावे, असे ते म्हणाले. “जर आमच्या खासदारांविषयी असे वृत्त समोर आले, तर त्यांनी ते खोडून काढावे. यावेळी महाराष्ट्राची जनता गप्प बसणार नाही,” असे ते म्हणाले.