आता विना सिमकार्ड व्हॉट्सअॅप नाही चालणार
1 मार्चपासून केंद्राकडून नवीन नियम : पुन्हा मुदतवाढ देण्यास सरकारचा नकार
वृत्तसंस्था/ नवी दिल्ली
केंद्र सरकारने स्पष्ट केले आहे की सिम-बाइंडिंग नियम लागू करण्यासाठी 28 फेब्रुवारीची अंतिम मुदत वाढवली जाणार नाही. नवीन नियमांनुसार, फोनमध्ये सिम कार्ड नसल्यास व्हॉट्सअॅपसारखे मेसेजिंग अॅप्स काम करणार नाहीत. संगणकावर लॉग इन केलेले व्हॉट्सअॅप देखील 6 तासांच्या आत लॉग आउट होणार असल्याची माहिती आहे.
सिम कवच म्हणजे काय?
सिम कवच हा एक सुरक्षा उपाय आहे. ते तुमचे मेसेजिंग अॅप तुमच्या भौतिक सिम कार्डवर लॉक करते. सर्वात मोठा फायदा म्हणजे हॅकर्स किंवा फसवणूक करणारे तुमचा नंबर दुसऱ्या डिव्हाइसवर वापरू शकणार नाहीत.
जाणून घेऊ नवे नियम
1.नवीन सिम-बाइंडिंग नियम कधी लागू होणार?
जेव्हा तुम्ही सिम-बाइंडिंगमध्ये एखादे अॅप जोडता तेव्हा तुमचे नोंदणीकृत सिम कार्ड फोनमध्ये असेल तरच ते अॅप उघडेल. हा नियम 1 मार्च 2026 पासून लागू होणार आहे.
- सरकारचा अंतिम मुदत वाढीस नकार का?
केंद्रीय दळणवळण मंत्री ज्योतिरादित्य सिंधिया यांनी सांगितले की नियमांचे पालन करण्यासाठी अंतिम मुदत वाढवण्याचा सध्या कोणताही विचार नाही. त्यांनी सांगितले की हे नियम राष्ट्रीय सुरक्षेचे रक्षण करण्यासाठी आणि फसवणूक रोखण्यासाठी लागू केले आहेत. सरकार सुरक्षेच्या मुद्यांवर तडजोड करणार नाही.
- मार्चनंतर वापरकर्त्यांना काय करावे लागणार?
वापरकर्त्यांनी त्यांच्या व्हॉट्सअॅप नंबरशी संबंधित सिमकार्ड त्याच फोनमध्ये घातले आहे याची खात्री करावी. जर फोनमधून सिमकार्ड काढून टाकले तर मेसेजिंग अॅप काम करणे थांबवू शकते.
- यावर टेक कंपन्या आणि संस्थांची भूमिका काय?
उद्योग संघटना आयएएमएआयने सरकारला इशारा दिला आहे की, कामासाठी व्हॉट्सअॅप वेबवर अवलंबून असलेल्या व्यावसायिकांसाठी तसेच समान खाते शेअर करणाऱ्या कुटुंबांसाठी सहा तासांचा लॉगआउट नियम समस्या निर्माण करणारा ठरणार आहे.
5.कंपन्यांनी पालन न केल्यास काय कारवाई होणर?
केंद्र सरकारच्या आदेशानुसार, कंपन्यांनी 120 दिवसांच्या आत अहवाल सादर करावा. पालन न केल्यास दूरसंचार कायदा 2023, टेलिकॉम सायबर सुरक्षा नियम आणि इतर लागू कायद्यांनुसार कारवाई करण्यात येणार आहे.