आता विनातक्रार स्पॅम कॉल्सवर होणार कारवाई

सर्व अनावश्यक कॉल्स एसएमएसद्वारे ब्लॉक केले जाणार : ट्रायकडून तिसरी सुधारणा अधिसूचना

वृत्तसंस्था, नवी दिल्ली

अनावश्यक आणि वारंवार येणाऱ्या स्पॅम कॉल्समुळे त्रस्त असलेल्या मोबाईल ग्राहकांसाठी एक मोठा बदल होणार आहे. आता कोणत्याही नंबरवर कारवाई करण्यासाठी ग्राहकाच्या तक्रारीची वाट पाहण्याची गरज भासणार नाही. जर टेलिकॉम कंपन्यांच्या एआय आधारित प्रणालीने एखाद्या कॉलरला संशयित स्पॅमर म्हणून ओळखले, तर त्याच्याविरुद्ध तपास आणि कारवाई सुरू केली जाऊ शकते.

भारतीय दूरसंचार नियामक प्राधिकरण म्हणजेच ट्रायने टेलिकॉम कमर्शियल कम्युनिकेशन्स कस्टमर प्रेफरन्स रूल्समध्ये तिसरी सुधारणा अधिसूचित केली आहे. नवीन नियमांनुसार स्पॅम कॉलर्सचे पुन्हा केवायसी करण्याची तरतूद आहे, ज्यामध्ये मोबाईल सेवा बंद करणे आणि गंभीर प्रकरणांमध्ये कायद्याची अंमलबजावणी करणाऱ्या संस्थांकडे तक्रार दाखल करण्यापर्यंतच्या उपाययोजनांचा समावेश आहे.

एआयने स्पॅम कॉल्स पकडले तर काय होईल?

जर एखाद्या टेलिकॉम कंपनीच्या एआय मशीन लर्निंग आधारित प्रणालीने येणारा कॉल ‘संशयास्पद स्पॅम’ म्हणून ओळखला, तर ज्या टेलिकॉम कंपनीच्या नेटवर्कवरून तो कॉल आला आहे, त्या कंपनीला याची माहिती देणे बंधनकारक आहे. स्पॅम कॉल ओळखल्यानंतर दोन तासांच्या आत ही माहिती देणे आवश्यक आहे. यानंतर, ज्या कंपनीच्या नेटवर्कवरून कॉल आला आहे, त्या कंपनीला एका कामकाजाच्या दिवसाच्या आत संबंधित कॉलरची केवायसी ओळख शोधून ही माहिती इतर टेलिकॉम कंपन्यांना द्यावी लागेल जर 10 दिवसांत 5 नंबर आढळले, तर कारवाई केली जाईल.

उल्लंघन केल्यास वर्षासाठी कनेक्शन बंद

यानंतर, दुहेरी उल्लंघन अधिक गंभीर असेल. संबंधित संस्थेची सिम कार्डसह सर्व दूरसंचार साधने एका वर्षासाठी खंडित केली जातील. उल्लंघन करणाऱ्यांना एका वर्षासाठी काळ्या यादीतही टाकले जाईल. या काळात कोणतीही दूरसंचार कंपनी त्याला नवीन दूरसंचार कनेक्शन देऊ शकणार नाही. तथापि, अशा व्यक्तीला एक फोन नंबर ठेवण्याची परवानगी असेल, ज्याची सामान्य आउटगोइंग सेवा निलंबित केली जाईल. या नंबरवरून फक्त आपत्कालीन सेवांना कॉल करता येईल.

ट्रू-कॉलरसारख्या अॅप्ससाठी नवीन नियम

ट्रायच्या सुधारित नियमांमध्ये कॉल मॅनेजमेंट अॅप्स आणि ट्रू-कॉलरसारख्या सेवांसाठीही तरतूद आहे. हे अॅप, केंद्र सरकारने व्यावसायिक आणि सरकारी संवादासाठी निश्चित केलेल्या विशेष नंबर सिरीजमधून येणाऱ्या कॉल्सना स्वत:च्या स्तरावर स्पॅम म्हणून टॅग, ब्लॉक किंवा फिल्टर करू शकणार नाही. यामध्ये 160 पासून सुरू होणाऱ्या नंबर सिरीजचाही समावेश आहे.

नवीन नियम कधी लागू होतील?

ट्रायनुसार, सुधारित नियम टप्प्याटप्प्याने लागू केले जातील. अधिसूचना जारी झाल्यापासून 30 ते 90 दिवसांच्या आत स्वतंत्र तरतुदी लागू होतील. नवीन नियमांनुसार, टर्मिनेटिंग अॅक्सेस प्रोव्हायडर्सना ओरिजिनेटिंग टेलिकॉम कंपनीकडून ए2 पी  कॉल्ससाठी प्रति मिनिट कमाल 5 पैसे आकारण्याची परवानगी देखील देण्यात आली आहे.