निफ्टी बँकेची विक्रमी झेप, बाजारात तेजी

सेन्सेक्स 388 अंकांनी तेजीत, मिडकॅप नव्या शिखरावर

वृत्तसंस्था/ मुंबई

सोमवार हा भारतीय शेअर बाजारासाठी अत्यंत उत्साही ठरला. बँक निफ्टी निर्देशांक व मिडकॅप निर्देशांकाने नव्या विक्रमावर स्वार झाल्याच्या पार्श्वभूमीवर शेअरबाजार चांगल्या तेजीसोबत बंद झाला.

सोमवारी सरतेशेवटी मुंबई शेअरबाजाराचा 30 समभागांचा सेन्सेक्स निर्देशांक 388 अंकांनी वाढत 84950 अंकांवर बंद झाला तर दुसरीकडे राष्ट्रीय शेअरबाजाराचा 50 समभागांचा निफ्टी निर्देशांक 103 अंकांनी वाढत 26013 अंकांवर बंद झाला. सेन्सेक्समधील 30`11111111 समभागांपैकी 20 समभाग तेजी दाखवत बंद झाले तर निफ्टीतील 50 पैकी 34 समभाग मजबूत होत बंद झाले आहेत. सोमवारी बँक निफ्टी निर्देशांक व मिडकॅप निर्देशांक यांनी सर्वोच्च स्तरावर स्वार होण्यात यश मिळवले. बँक निफ्टी निर्देशांक 445 अंक वाढत 58962 या नव्या शिखरावर बंद झालेला दिसून आला. तर सोबतच मिडकॅप निर्देशांकही 441 अंकांची भर घालत 61181 च्या विक्रमी स्तरावर बंद होण्यात यशस्वी झाला. स्मॉलकॅप समभागांमध्येही खरेदी दिसून आली. सार्वजनिक बँका, ऑटो, बँकिंग समभागांमध्ये खरेदी पाहायला मिळाली. निफ्टी बँक निर्देशांकात 12 बँकांचे समभाग मजबूतीसह बंद झाले.

 हे समभाग वधारले

शेअरबाजारात इटर्नल, टायटन, आयशर मोटर्स, मारुती सुझुकी, बजाज ऑटो, कोटक महिंद्रा, श्रीराम फायनान्स, महिंद्रा आणि महिंद्रा, अपोलो हॉस्पिटल, अदानी एंटरप्रायझेस, पॉवरग्रिड कॉर्प, बजाज फायनान्स, एसबीआय, भारती एअरटेल, जेएसडब्ल्यू स्टील, हिंडाल्को, इन्फोसिस, एनटीपीसी, ग्रासिम, सिप्ला, ओएनजीसी, ट्रेंट, लार्सन टुब्रो यांचे समभाग वधारत बंद झाले.

 हे समभाग घसरणीत

रिलायन्स, नेस्ले, एचयुएल, विप्रो, एसबीआय लाइफ, आयटीसी, एचडीएफसी लाइफ, टाटा मोटर्स पीव्ही, एशियन पेंटस्, अदानी पोर्टस्, अल्ट्राटेक सिमेंट, टाटा स्टील, टीसीएस, बीईएल, इंडिगो यांचे समभाग बाजारात घसरणीसोबत बंद झाले होते.