न्यूझीलंडचा मालिकेतील पहिला विजय

भारताचा 50 धावांनी पराभव, सामनावीर सीफर्टचे अर्धशतक, सँटनरचे 3 बळी, दुबेचे प्रयत्न अपुरे

वृत्तसंस्था / विशाखापट्टणम

सामनावीर टिम सीफर्टचे दमदार अर्धशतक तसेच सँटनरच्या भेदक गोलंदाजीच्या जोरावर येथे बुधवारी खेळविण्यात आलेल्या सामन्यात न्यूझीलंडने यजमान भारताचा 50 धावांनी पराभव करत पाच सामन्यांच्या टी-20 मालिकेत आपला पहिला विजय नोंदविला. भारताने या मालिकेतील पहिले सलग तीन सामने जिंकून विजयी आघाडी मिळविली आहे.

बुधवारच्या चौथ्या सामन्यात भारताने नाणेफेक जिंकून न्यूझीलंडला प्रथम फलंदाजी दिली. न्यूझीलंडने 20 षटकांत 7 बाद 215 धावा जमविल्या. त्यानंतर भारताचा डाव 18.4 षटकांत 165 धावांत आटोपला.

न्यूझीलंडच्या डावामध्ये टिम सीफर्टने दमदार फलंदाजी करत 36 चेंडूत 3 षटकार आणि 7 चौकारांसह जलद 62 धावा झोडपताना कॉनवेसमवेत सलामीच्या गड्यासाठी 50 चेंडूत शतकी भागिदारी केली. कॉनवेने 23 चेंडूत 3 षटकार आणि 4 षटकारासह 44 धावा झळकविल्या. सीफर्टने यापूर्वी बिग बॅश लीग स्पर्धेत खेळल्यानंतर त्याचे न्यूझीलंड संघात आगमन झाले. सीफर्टने अर्शदीप सिंगच्या एका षटकात सलग तीन चौकार मारले. त्यानंतर हर्षित राणाला लाँगऑनच्या दिशेने 1 षटकार खेचला. बुमराहच्या गोलंदाजीवर त्याने पाठोपाठच्या चेंडूवर 1 षटकार आणि 1 चौकार मारला. न्यूझीलंडने चौथ्याच षटकात अर्धशतक नोंदविले तर पॉवरप्ले दरम्यानच्या 6 षटकांत बिनबाद 71 धावा जमविल्या होत्या. सीफर्टने आपले अर्धशतक 25 चेंडूत पूर्ण केले. त्यानंतर भारतीय गोलंदाजांनी 37 धावांत न्यूझीलंडचे 4 गडी बाद केले. 13.4 षटकात न्यूझीलंडने 4 बाद 137 धावा जमविल्या होत्या. रचिन रवींद्र केवळ 2 धावांवर बाद झाला. फिलीप्सने 16 चेंडूत 1 षटकार आणि 3 चौकारांसह 24 धावा केल्या. डॅरील मिचेलने 18 चेंडूत 3 षटकार आणि 2 चौकारांसह नाबाद 39, कर्णधार सँटनरने 1 षटकार आणि 1 चौकारासह 11, फॉक्सने 1 षटकार आणि 1 चौकारासह 13 धावा केल्या. न्यूझीलंडच्या डावात 12 षटकार आणि 20 चौकार नोंदविले गेले. भारतातर्फे कुलदीप यादव आणि अर्शदीप सिंग यांनी प्रत्येकी 2 तर बुमराह आणि बिश्नोई यांनी प्रत्येकी 1 गडी बाद केला.

प्रत्युत्तरादाखल खेळताना भारताच्या डावाला डळमळीत सुरूवात झाली. पहिल्याच षटकातील पहिल्याच चेंडूवर सलामीचा अभिषेक शर्मा हेन्रीच्या गोलंदाजीवर खाते उघडण्यापूर्वी बाद झाला. त्यानंतर डफीने स्वत:च्याच गोलंदाजीवर कर्णधार सूर्यकुमारला बाद केले. त्याने 8 धावा केल्या. संजू सॅमसनने 15 चेंडूत 1 षटकार आणि 3 चौकारांसह 24 धावा जमविल्या. सँटनरने त्याचा त्रिफळा उडविला. फॉक्सने हार्दीक पंड्याला 2 धावांवर त्रिफळाचीत केले. रिंकू सिंग आणि शिवम दुबे यांनी अनुक्रमे 39 आणि 65 धावांचे योगदान दिल्यामुळे भारताला 165 धावांपर्यंत मजल मारता आली. रिंकू सिंगने 30 चेंडूत 2 षटकार आणि 3 चौकारांसह 39 तर शिवम दुबेने 23 चेंडूत 7 षटकार आणि 3 चौकारांसह 65 धावा झळकविल्या. बिश्नोईने नाबाद 10 धावा केल्या. अर्शदीप सिंगला खाते उघडता आले नाही. बुमराह, कुलदीप यादव व हर्षित राणा यांना दुहेरी धावसंख्या गाठता आली नाही. भारताच्या डावामध्ये 14 चौकार आणि 10 षटकार नोंदविले गेले. न्यूझीलंडतर्फे सँटनरने 26 धावांत 3 तर डफी आणि सोधी यांनी प्रत्येकी 2 तसेच हेन्री व फॉक्स यांनी प्रत्येकी 1 गडी बाद केला. आता या मालिकेतील शेवटचा सामना शनिवारी 31 जानेवारी रोजी थिरुवनंतपूरम येथे होणार आहे. भारताने मालिकेत 3-1 अशी आघाडी मिळविली आहे.

संक्षिप्त धावफलक : न्यूझीलंड 20 षटकांत 7 बाद 215 (सीफर्ट 62, कॉनवे 44, मिचेल नाबाद 39, फिलिप्स 24, सँटनर 11, फॉक्स 13, अर्शदीप सिंग व कुलदीप यादव प्रत्येकी 2 बळी, बुमराह व बिश्नोई प्रत्येकी 1 बळी), भारत 18.4 षटकांत सर्वबाद 165 (शिवम दुबे 23 चेंडूत 65, रिंकू सिंग 39, संजू सॅमसन 24, बिश्नोई 10, सँटनर 3-26, डफी व सोधी प्रत्येकी 2 बळी, हेन्री व फॉक्स प्रत्येकी 1 बळी).