आज राष्ट्रवादीचे सर्वेसर्वा शरद पवार कोल्हापुरात

कोल्हापूर : 
राष्ट्रवादी काँग्रेस पक्षाचे सर्वेसर्वा ज्येष्ठ नेते शरद पवार आज शुक्रवार 15 रोजी कोल्हापूर दौऱ्यावर येत आहेत. इचलकरंजी, चंदगड आणि गडहिंग्लज येथे त्यांच्या जाहीर सभा होणार आहेत. उत्तर महाराष्ट्र, मराठवाडा, विदर्भ येथील दौरे संपवून ते आज कोल्हापुरात येत आहेत. येथील सभांदरम्यान त्यांनी प्रत्येक विधानसभा मतदार संघात एक टॅग लाईन दिली आहे. त्यामुळे कोल्हापूरातील सभेत ज्येष्ठ नेते पवार काय बोलणार याकडे राजकीय वर्तुळाचे लक्ष असणार आहे.

तसेच काँग्रेस नेत्या प्रियंका गांधी शनिवार 16 रोजी कोल्हापूरात येत आहेत. काँग्रेस उमेदवारांच्या प्रचारार्थ त्यांची शिवाजी पेठेतील गांधी मैदान येथे जाहीर सभा होत आहे. सभेच्या अनुषंगाने काँग्रेसचे जिल्हाध्यक्ष सतेज पाटील यांनी काँग्रेसचे पदाधिकारी, महिला आघाडीसोबत बैठक घेत सभेच्या तयारीबाबत विविध सूचना केल्या. बैठकीला महिला आघाडीच्या पदाधिकारी सरलाताई पाटील, भारती पोवार, सुलोचना नाईकवडे, दिपा पाटील, संध्या घोटणे आदींसह कार्यकर्ते उपस्थित होते.

दरम्यान, महायुतीच्या उमेदवारांच्या प्रचारार्थ उत्तर प्रदेशचे मुख्यमंत्री योगी आदित्यनाथ यांची रविवार 17 रोजी दुपारी 12 वाजता जाहीर सभा आयोजित केली आहे. सभेची जय्यत तयारी भाजपकडून सुरु आहे. सभेच्या पार्श्वभूमीवर शहरात विविध ठिकाणी पोस्टरबाजी करण्यात आली आहे.