रश्मिकाच्या चित्रपटात नवाजुद्दीन खलनायक

‘थम्बा’ चित्रपटात दिसणार अभिनयाची जुगलबंदी

नवाजुद्दीन सिद्दीकीला आगामी वॅम्पायर कॉमेडी चित्रपट ‘थम्बा’मध्ये खलनायकाच्या भूमिकेसाठी निवडण्यात आले आहे. आयुष्मान खुराना आणि रश्मिका मंदाना यांची मुख्य भूमिका असलेला हा चित्रपट दिनेश विजान यांच्या हॉरर-कॉमेडी युनिव्हर्सचा हिस्सा आहे.

थम्बा या चित्रपटात नवाजुद्दीनची व्यक्तिरेखा हिंसक असल्याचे समजते. ही व्यक्तिरेखा प्राचीन विजयनगर साम्राज्याशी संबंधित दर्शविण्यात येणार आहे. थम्बा या चित्रपटाच्या मुख्य कलाकारांनी स्वत:च्या भूमिकांसाठी तयारी सुरू केली आहे. रश्मिका मंदानाची लुक टेस्ट मागील महिन्यात पार पडली आहे. आदित्य सरपोतदार याच्या दिग्दर्शनातील हा चित्रपट नोव्हेंबर महिन्याच्या अखेरीस किंवा डिसेंबरच्या प्रारंभी प्रदर्शित होण्याची अपेक्षा आहे.

या चित्रपटात खलनायकाची भूमिका साकारणे नवाजुद्दीनसाठी एक रोमांचक आव्हान असणार आहे. नवाजुद्दीनने यापूर्वी 2015 मध्ये प्रदर्शित ‘बदलापूर’, 2017 मध्ये प्रदर्शित ‘मुन्ना मायकल’, 2014 मध्ये प्रदर्शित ‘किक’ आणि 2019 मध्ये प्रदर्शित ‘पेट्टा’ या चित्रपटांमध्ये खलनायकाची भूमिका साकारत प्रेक्षकांची मने जिंकली होती.