श्रवणच्या संशयास्पद मृत्यूने हादरले नगरगाव

अंगणातच सापडला मृतदेह : गळ्यात नायलॉन दोरी, जखमा,पोलिसांसमोर मोठे आव्हान

वाळपई : नगरगाव आंबेडे येथे 24 वर्षीय श्रवण देविदास बर्वे या तऊणाचा मृतदेह घराच्या अंगणामध्ये संशयास्पदरित्या सापडला. त्याच्या गळ्यामध्ये दोरी होती. हाताला जखम झाली होती. गळ्यालाही जखम झाली होती. यामुळे त्याचा खून झाल्याचा संशय वडिलांनी व त्याच्या भावाने व्यक्त केलेला आहे. सदर घटनेमुळे नगरगाव परिसरामध्ये खळबळ निर्माण झालेली आहे. सकाळी 9 वाजण्याच्या सुमारास त्याच्या वडिलांनी त्याला अंगणात पडलेला पाहिला व त्यानंतर या संदर्भाची माहिती वाळपई पोलिसांना दिली. उत्तर गोवा विभागाचे पोलिस अधीक्षक अक्षत कौशल यांनी या संदर्भात संशय व्यक्त केलेला आहे. मात्र जोपर्यंत उत्तरीय तपासणीचा अहवाल प्राप्त होत नाही तोपर्यंत सदर घटना हा खुनाचा किंवा घातपात की आत्महत्या हे सांगणे कठीण असल्याचे स्पष्ट केले आहे. पोलिस खात्यातील कर्तबगार अधिकाऱ्यांचे विशेष पथक तयार करण्यात आले असून ते याकामी चौकशी करतील आणि या घटनेमाचे रहस्य उघड करतील, असा दावा कौशल यांनी केला आहे.

अंगणात सापडला मृतदेह 

नगरगाव आंबेडे येथील श्रीहनुमान मंदिराच्या परिसरापासून जवळपास 100 मीटर अंतरावर देविदास बर्वे यांचे घर आहे. घराच्या सभोवताली बागायत आहे. मंगळवारी सकाळी 9 वाजण्याच्या सुमारास श्रवण बर्वे यांचा मृतदेह घराच्या अंगणामध्ये त्याच्या वडिलांनी पाहिला. त्यांनीच याबाबतची माहिती वाळपई पोलिसांना दिली. पोलिस निरीक्षक विदेश शिरोडकर, तपास अधिकारी सनिशा नाईक व इतर पोलिस घटनास्थळी दाखल झाले. पंचनामाच्या दरम्यान अनेक संशयास्पद गोष्टी आढळून आलेल्या आहेत.

रात्री एकटाच होता घरात 

वडिलांनी दिलेल्या माहितीनुसार श्रवण बर्वे हा सोमवारी रात्री एकटाच घरामध्ये होता. त्याचे वडील, आई व भाऊ होंडा या ठिकाणी असलेल्या नारायणनगर येथील घरामध्ये राहायला गेले होते. मंगळवारी सकाळी त्याचे वडील नगरगाव या ठिकाणी परतल्यानंतर सदर प्रकार उघडकीस आला. श्रवण बर्वे यांचे वडील देविदास व त्याच्या भावाने सदर प्रकार हा खुनाचा अर्थातच घातपात असण्याची शक्यता वर्तवली आहे. ज्या पद्धतीने त्याचा मृतदेह अंगणामध्ये सापडला, घराचा दरवाजा उघडा होता. मोबाईल घरामध्ये होता. यामुळे त्याचा कुणीतरी घातपात करण्याची शक्यता वाटत असल्याचे त्यांनी पत्रकाराशी बोलताना सांगितले.

फॉरेन्सिक पथक दाखल

सदर प्रकरणाचा उलगडा करण्यासाठी पोलिस खात्याने फॉरेन्सिक पथकाला पाचारण केले. दुपारी 2 वा. सुमारास सदर पथक घटनास्थळी दाखल झाले. त्यांनी संपूर्ण परिसराची पाहणी केली व अनेक ठिकाणी असलेले महत्त्वाचे दस्तऐवज गोळा केलेले आहेत. अनेक नमुने गोळा केलेले आहेत. त्याच्या गळ्यामध्ये असलेली दोरी पोलिसांनी ताब्यात घेतलेली आहे. श्रवण याचा मोबाईल पोलिसांनी जप्त केलेला आहे. मंगळवारी दुपारी 2.30 वाजण्याच्या सुमारास पंचनाम्याची प्रक्रिया पूर्ण करून मृतदेह उत्तरीय तपासणीसाठी गोवा मेडिकल कॉलेजमध्ये पाठविण्यात आलेला आहे. सदर मृतदेहावर उत्तररीय तपासणी झाल्यानंतर प्रकरणाची गुंतागुंत सुटणार आहे.

 रात्री 11 वाजेपर्यंत होता मित्रांसोबत

मिळालेल्या माहितीनुसार सोमवारी रात्री 11 वाजेपर्यंत श्रवण श्रीहनुमान मंदिरानजीक असलेल्या अनेक मित्रांच्या समवेत होता. त्यांनी आयपीएलचा क्रिकेट सामना पाहिला. त्यानंतर तो झोपण्यास आपल्या घरी गेला. मात्र सकाळी त्याचा मृतदेह अंगणात सापडला. यामुळे मित्रांनी आश्चर्य व्यक्त केले आहे. रात्री अकरा वाजेपर्यंत गप्पागोष्टीमध्ये रंगलेला श्रवण दुसऱ्या दिवशी मृत अवस्थेत सापडला, याबद्दल मित्रांनी साशंकता व्यक्त केलेली आहे. त्याच्या मृत्यूमागे घातपात असण्याची शक्यता त्याच्या मित्रानेसुद्धा व्यक्त केलेली आहे.