म्युच्युअल फंड गुंतवणुकीने पकडली तेजी

ऑगस्ट 2026 मधील आकडेवारीमधून माहिती : स्मॉलकॅप, मिडकॅपला पहिली पसंती

वृत्तसंस्था, नवी दिल्ली

शेअर बाजारातील चढ- उतारांदरम्यान, म्युच्युअल फंड गुंतवणूकदारांनी इक्विटी फंडांवर विश्वास ठेवला आहे. ऑगस्टमध्ये इक्विटी म्युच्युअल फंड योजनांमध्ये एकूण 29,329 कोटी रुपयांचा निव्वळ ओघ दिसून आला. ही गेल्या 4 महिन्यांतील सर्वात मोठी मासिक गुंतवणूक आहे. जुलैमध्ये इक्विटी फंडांमध्ये 24,697 कोटी रुपयांचा ओघ होता, म्हणजेच एका महिन्यात ओघात जवळपास 19 टक्के इतकी वाढ झाली आहे.

ऑगस्टमधील 29,329 कोटी रुपयांचा ओघ हा एप्रिलनंतर इक्विटी फंडांमधील सर्वात मोठा मासिक ओघ आहे. एप्रिलमध्ये गुंतवणूकदारांनी इक्विटी-आधारित योजनांमध्ये 38,440 कोटी रुपयांची गुंतवणूक केली होती. त्यानंतर जूनमध्ये इक्विटी योजनांमध्ये 28,973 कोटी रुपयांचा आणि मेमध्ये 22,908 कोटी रुपयांचा निव्वळ ओघ दिसून आला. या आकडेवारीवरून हे स्पष्ट होते की, बाजारातील चढ-उतारांनंतरही इक्विटी म्युच्युअल फंडांमध्ये गुंतवणूक करण्याची आवड कायम आहे.

स्मॉलकॅप फंडांमध्ये सर्वाधिक गुंतवणूक

ऑगस्टमध्ये गुंतवणूकदारांनी स्मॉलकॅप म्युच्युअल फंडांना सर्वाधिक पसंती दिली. या योजनेत एकूण 7,973 कोटी रुपयांचा निव्वळ ओघ आला. स्मॉलकॅपनंतर, मिडकॅप फंड गुंतवणूकदारांची दुसरी सर्वात मोठी पसंती आहे. ऑगस्टमध्ये मिडकॅप योजनांमध्ये 6,989 कोटी रुपयांची गुंतवणूक झाली. यावरून असे दिसून येते की, गुंतवणूकदार मोठ्या कंपन्यांसोबतच मिडकॅप आणि स्मॉलकॅप कंपन्यांमध्येही वाढीच्या संधी शोधत आहेत.

लार्जकॅप फंडांमध्ये ओघ

स्मॉलकॅप आणि मिडकॅप फंडांमध्ये स्थिर ओघ दिसून आला असला तरी, लार्जकॅप फंडांमध्ये वेगळा कल दिसून आला आहे. ऑगस्टमध्ये लार्जकॅप फंडांमधून 1,147 कोटी रुपयांचा निव्वळ बहिर्वाह नोंदवला गेला. म्हणजेच, गुंतवणूकदारांनी मोठ्या कंपन्यांवरील आपले लक्ष कमी केले आणि ऑगस्टमध्ये मिडकॅप व स्मॉलकॅप विभागांमध्ये अधिक गुंतवणूक केली.

एकूण म्युच्युअल फंड ओघात मोठी घट

इक्विटी फंडांची आकडेवारी मजबूत राहिली असली तरी, ऑगस्टमध्ये संपूर्ण म्युच्युअल फंड उद्योगातील निव्वळ ओघात मोठी घट झाली. ऑगस्टमध्ये उद्योगाचा एकूण निव्वळ ओघ (नेट इनफ्लो) 41,353 कोटी रुपये होता, तर जुलैमध्ये हा आकडा 2.36 लाख कोटी रुपये होता. या मोठ्या घसरणीचे मुख्य कारण डेट-ओरिएंटेड योजनांमधून पैसे काढणे हे होते. ऑगस्टमध्ये डेट योजनेतून 8,127 कोटी रुपयांचा निव्वळ बहिर्वाह (नेट आऊटफ्लो) झाला, तर जुलैमध्ये या योजनेत 1.88 लाख कोटी रुपयांचा मोठा ओघ (इनफ्लो) आला होता.

म्युच्युअल फंडाच्या एयूएममध्ये पुन्हा वाढ

एकूण ओघात मोठी घट होऊनही म्युच्युअल फंड उद्योगाची व्यवस्थापनाखालील मालमत्ता (एयूएम) वाढली आहे. ऑगस्टच्या अखेरीस उद्योगाची एकूण एयूएम वाढून 87.07 लाख कोटी रुपये झाली. जुलैच्या अखेरीस म्युच्युअल फंड उद्योगाची एयूएम 85.75 लाख कोटी रुपये होती. म्हणजेच, एका महिन्यात एयूएममध्ये सुमारे 1.32 लाख कोटी रुपयांची वाढ झाली.